சாமி என்ன காப்பாத்து...

நான் இன்று காலை டிவியில் ஒளிபரப்பட்ட ஒரு பழைய படத்தின் காட்சியை பார்த்ததும் ரொம்ப வருத்தமாக இருந்தது. இது கன்னட மொழி படம். அதனை இங்கே உங்களுடன் பகிர்ந்து கொள்கிறேன்.

காட்டுக்குள் சுள்ளிபொறுக்க சென்ற ஒரு சிறுவனை பாம்பு கடித்து விடுகிறது.

இந்த சம்பவத்துக்கு, அந்த படத்தில் சொல்லப்பட்ட காட்சியினை இங்கே விவரிக்கிறேன்.

அதாவது ஒரு சிறுவன் தன் நண்பர்களுடன் காட்டுக்குள் சுள்ளிபொறுக்க செல்கிறான். எங்குமே சரியான விறகு குச்சிகள் கிடைக்கவில்லை. அவன் அங்கிங்கு தேடி அலைகிறான். ஒரு இடத்தில் மந்திர தந்திரத்தால் ஒரு பாம்பு புத்தை சுற்றி செடி புட்புதர் திடிரென முளைக்கிறது. அந்த இடத்துக்கு வரும் சிறுவன் மகிழ்ச்சியடைந்து பாம்புபுத்துக்கு அருகில் சென்று குச்சி ஒடிக்கிறான். அந்த நேரம்பார்த்து பாம்பு கடித்துவிடுகிறது.

உடனே அவன் அய்யோ அம்மா அப்பா என்று சத்தமிட்டு கதறுகிறான். சத்தம் கேட்டு அவன்கூட சென்றவர்கள் வந்து பார்க்கும்போது பாம்பு கடித்து வலியால் துடிப்பதை பார்க்கிறார்கள். டேய் என்னடா ஆச்சி.. என்னாச்சி என்னாச்சி.. சொல்லுடா என்று கேட்கிறார்கள். வலியால் அவனால் பேசமுடியாததால் அவன் கையை காட்டுகிறான். கை காட்டும் திசையில் ஒரு பாம்பு படமெடுத்து நிற்கிறது. இவர்கள் அந்த காட்சியை கண்டு உடனே அந்த பையனை அதே இடத்தில் போட்டுவிட்டு சென்றுவிடுகிறார்கள்.

தன் மகனை காணாது இவர்கள் மட்டும் வருவதை கண்ட அந்த பையனின் தாய் கேட்கிறார் " எங்கடா என் பையனை" . சிறிது நேர மௌனத்துக்கு பின்னர் அவர்களில் ஒருவன் உங்க பையனை பாம்பு கடித்துவிட்டது. என்று சொல்கிறான். பாம்பு கடிபட்ட அந்த பையனின் அம்மா ஒரு பணக்கார வீட்டில் வேலை செய்கிறார். உடனே அவன் தாய் அந்த பணக்கார எஜமானி அம்மாவிடம் என் பையனை பாம்பு கடித்துவிட்டது. நான் போக வேண்டும் என்று கேட்கிறார். கொடுமைக்கார எஜமானி அதெல்லாம் முடியாது.. நீ போகக்கூடாது.. இங்குள்ள வேலையெல்லாம் யார் செய்வா.. முடியவேமுடியாது என்று கர்ஜிக்கிறாள். இந்தம்மா கெஞ்சுகிறார். இதனை பார்த்த எஜமானியின் கணவன் பாவம் அவங்க போகட்டும் என்று சொல்கிறார். அதெல்லாம் முடியாது என்று மறுக்கிறாள் எஜமானி. அவர் வலுக்கட்டாயமாக பாம்பு கடித்த பையனின் அம்மாவை அனுப்பிவிடுகிறார்.

பாம்பு கடித்த இடத்துக்குவரும் தாய் மகனை பார்த்து அய்யோ என் மகனே என்னடா ஆச்சி.. என்று கேட்கிறார். உடனே அந்த பையன் அம்மா என்னை பாம்பு கடித்து விட்டது என்று பேசமுடியாமல் மெதுவாக சொல்கிறான். அய்யோ என்ன செய்வேன் என் ஒரே மகனை பாம்பு கடித்துவிட்டதே இனி நான் என்ன செய்வேன். என்று அழுது அரற்றுகிறாள். இதற்குள் அந்த பையனின் வாயிலிருந்து நுரைதள்ளி மெல்ல மெல்ல அந்த பையன் இறந்துபோகிறான்.

விதியினால் அந்த பையன் பாம்பு கடித்து இறந்து போய்விட்டானாம். பின்னர் அந்த தாய் அழுதுபுலம்பி சாமியிடம் மன்றாடி பாட்டுப்பாடி அழுதுஅழுது மயங்கி விழுகிறாள். உடனே சாமியிடமிருந்து அருள் பெற்று அந்த பையன் மீண்டும் உயிர்த்தெழும்புகிறான்.

இதுதான் அந்த படத்தில் சொல்லப்பட்ட ஒரு காட்சி.

இந்த படக்காட்சியில் எத்தனை எத்தனை லாஜிக்மீறல்கள். எவ்வளவு மூடநம்பிக்கைகள்.

பாம்பு கடிபட்ட அந்த பையன்மேல் எந்தவிதமான குறையே இல்லை. முதலில் பாம்புபுத்தை சுற்றி ஒரே நிமிடத்தில் புதர் வளர்வது என்பது சாத்தியமானதா சொல்லுங்கள். ஒரு நிமிசத்தில் புதர் வளர்வது அதிசயத்திலும் அதிசயம். எந்த உலகத்தில் நடக்கும்?. பையன் அறியாவயசு அவன் ஆர்வத்தில் பாம்புபுத்துக்கு அருகில் சென்று குச்சி ஒடிக்கும்போது பாம்பு கடித்துவிடுகிறது.

அடுத்தது அவன்கூட வந்தசிறுவர்கள் பாம்பு கடிபட்டவனை எந்த முதலுதவியும் செய்யாமல் சென்றுவிடுகிறார்கள். ஏன் அந்த பையனுக்கு மருந்து மூலீகைகளை பறித்து கட்டு போட்டு விஷம் தலைக்கு ஏறாமல் இருக்குமாறு செய்யலாம். அல்லது ஈரத்துணியை நன்றாக இறுக்கி காலில் கட்டு போட்டு விடலாம். அல்லது இவர்களுக்கு இதெல்லாம் தெரியலைன்னா ஊருக்குள் சென்று வைத்தியரை அழைத்துவந்து காப்பாத்தி இருக்கலாம். அவர்கள் அந்த பையனின் அம்மாவிடம் போய் சொல்லுகிறார்கள் எந்தவிதமான பதட்டமோ அக்கறையோ இல்லாமல்..

அடுத்தது, இதனை கேட்ட பையனின் அம்மா பதறித்துடிக்காமல் உடனே மகனை பார்க்க செல்லாமல் அவளது எஜமானியிடம் போய் அனுமதி கேட்கிறாள். இதில் என்ன வருத்தம் என்றால் எந்ததாயாவது பிள்ளைக்கு பாம்பு கடித்துவிட்டது என்றால் எஜமானியிடம் போய் அனுமதி கேட்பாளா... சொல்லுங்கள். தன்குழந்தைக்கு எதாவது ஒன்று சிறுதலைவலியோ காய்ச்சலோ என்றால் உடனே மருத்துவரை பார்க்க ஓடுவார்கள். இதுதான் தாய் பிள்ளையின் மேல் வைத்திருக்கும் பாசம். யாரும் பார்த்துக்கிட்டு சும்மா இருக்கமாட்டார்கள். இதற்கெல்லாம் அனுமதி கேட்டுதான் போகவேண்டுமா?...


அடுத்தது, அந்த எஜமானி அம்மாவோ ரொம்ப ஈனஇரக்கம் மனிதாபிமானம் இல்லாமல் அனுமதி கொடுக்க மறுக்கிறாளே.. இதே அவள் பிள்ளைக்கு என்றால் சும்மா இருப்பாளா.. என்னதான் கொடுமைக்காரி என்றாலும் அவளும் ஒருதாய்தானே ஏன் மனிதாபிமானம் இல்லாமல் போய்விட்டது?...

அடுத்தது, பாம்புகடிபட்ட சிறுவனை பார்க்க அவன் தாய் செல்கிறாள். ஏன் வைத்தியரிடம் விஷயத்தை சொல்லி அழைத்து அல்லவா சென்றிருக்கவேண்டும்...

அடுத்தது, சிறுவன் உயிர்பிரியும் தருணத்தில் வாயில்நுரையாக வருகிறது. அப்போது அவன் தாய் அவனை மடியில் இட்டு வசன‌ங்களா பேசித் தள்ளுகிறாள். ஒரு தடவைகூட ஞாபகமில்லையா பையனை காப்பாற்றவேண்டுமென்று?.. அவள் அப்போதும் எந்த முதலுதவியோ மருத்துவத்தை அணுகவோ தெரியலியா.. எந்ததாயாவது இப்படி வசன‌ங்கள் பேசுவாளா.. சாகிறது விதின்னா அதை மாற்றமுடியாதுதான். அதற்கு முன்னால் நம்மால் முடிந்த அளவுக்கு விதியின் தடுக்கலாமே.. சாவிலிருந்து காப்பாற்றி இருக்கலாமே..

கடவுள் அருள் இருந்தால் நாம் எதையும் சாதிக்கலாம். துன்பத்திலிருந்து நம்மை இறைவன் காப்பாற்றுவார். ஆனால் மூட நம்பிக்கைகளையும் பழக்க வழக்கங்களையும் இறைவன் எப்போதும் விரும்புவதில்லை. ஒரு உயிர் 15 நிமிடத்துக்கும் மேல் போராடிக்கொண்டிருக்கிறது. ஒரு 5 நிமிடத்தில் அந்த பையனை காப்பாற்றி இருக்கலாமே அவன் பிழைத்து இருப்பானே.. யாருக்குமே தோன்றவில்லையே என்பதுதான் எனது கருத்து. அப்போதும் எக்கேடுகெட்டு போனா என்ன?.. கடவுள் அருள் அவனுக்கு கிடைக்கும்; அவன் பிழைப்பான் என்று மூட நம்பிக்கையுடன் இருந்தால் எப்படி பிழைக்கமுடியும். நம்மால் ஆன முயற்சிகளை மேற்க்கொண்டு இறைவனிடம் வேண்டினால் இறைவன் நம் வேண்டுகோளுக்கு செவி சாய்ப்பான்.

எந்தமுயற்சியுமே இல்லாமல் கடவுளே காப்பாத்து காப்பாத்து.. என்று முட்டிமுட்டி அழுதால் எப்படி நடக்கும்?

இதேமாதிரி எத்தனை படங்களில் இதுபோன்ற காட்சிகள் இடம்பெற்று உள்ளன. அத்தனையும் மூடநம்பிக்கைகளை போதிப்பதாக உள்ளது. இந்தமாதிரி படங்கள் மக்களை மூடனாக ஆக்குவது வருந்ததக்கது.

எனவே மூடநம்பிக்கைகளை விட்டுடொழியுங்கள். கடவுள் நம்மோடுதான் இருக்கிறார். அவர் நம்மை துன்பங்களில் இருந்து காப்பாற்றுவார்.


உங்கள் மேலான கருத்துக்களை எதிர்பார்த்தவனாக உங்கள் ஸ்டார்ஜன்.

,

Post Comment