பாலைவனத்துச் சுடர்

அரேபியர்களின் அறியாமைக் கால அநியாயங்களுக்கு முடிவுகட்டும் வகையில் உலக வரலாற்றுப் பொன்னேடு சந்தித்திராத ஒப்பற்ற ஒரு சகாப்தம் மலர்ந்தது. அந்த ஒளிமயமான சகாப்தத்தின் முதல் குரலாக "இறைவன் ஒருவன்! அவன் இணையில்லாதவன்! துணையில்லாதவன்! எங்கும் நிறைந்தவன்! எல்லாம் தெரிந்தவன்! என்ற ஏகத்துவம் பிறந்தது.

ஏகத்துவக்குரல் தந்த மனிதகுல மாணிக்கம் தாம் முஹம்மது (ஸல்) அவர்கள்!
அவர்களின் ஏகத்துவக் குரல் ஓங்காரமாக ஒலித்தபோது சிலிர்த்தெழும் சிங்கமெனச் சினந்தெழுந்தது அரபு சமுதாயம். கனலாகத் தாக்கும் பாலை நிலத்தைப் போல அனலாக தாக்கியது அரபு சமுதாயத்தின் எதிர்ப்புக் கணை. அனலாகப் பாய்ந்த அரபு சமுதாயத்தின் எதிர்ப்பினைக் கண்ட அண்ணல் நபி (ஸல்) அவர்கள் குளிர் புனலாக கருத்துக்களை கொட்டினார்கள்.

அடங்கவில்லை அரபுச் சமுதாயம்! ஆர்ப்பரித்தது ஆழ்கடல் அலையாக! அண்ணல் நபி (ஸல்) அவர்கள் உயிருக்கே விலை பேசினார்கள். எனவே

பிறந்த மண்ணை (மக்கா) மறந்து, நெஞ்சைக் கவர்ந்த மண்ணான மதீனமா நகருக்கு இரவோடு இரவாகப் பயணமானார்கள். மதீனா நகர் அடைந்த மன்னர் மாநபி (ஸல்) அவர்களை மலர்த்தூவி வரவேற்றார்கள் அந்நகரத்து மக்கள்.

நாட்கள் நகர்ந்தன. நபிகள் நாயகம் (ஸல்) அவர்களின் மேலான இலட்சியமும் வளர்ந்தது. செம்மல் நபிகள் நாயகம் (ஸல்) அவர்கள் ஏகத்துவப் பாதையிலே நலம் நாடும் நல்லவர்கள் பலர் வந்து மாநபியின் போதனையை உளமேற்றார்கள். மாநபியின் மேலான போதனையில் பற்றுக்கொண்ட மக்கா வாழ் மக்களுள் சிலரும் மதீனா வந்து சேர்ந்தார்கள். நாடு கடந்து சென்று, பீடு நடை போடுகின்ற ஈடுகாணமுடியாத ஏகத்துவத்தின் வளர்ச்சியைப் பற்றி செவியேற்ற மக்கத்துக் குறைஷியர்கள், மதீனா நகர் நோக்கிக் கடல் அலைகள் எனப் படைநடத்தி வந்தார்கள்.

வம்பிழுக்க வரும் பகையை வாழவிடுவது கோழைத்தனத்தின் அடையாளமல்லவா?.. எனவே, மனிதகுல மாணிக்கம் நாயகம் (ஸல்) அவர்கள் தீன் வழி சார்ந்த தோழர்களைக் கூட்டிப் பேரணி ஒன்றைத் திரட்டிப் பத்ரு என்னும் போர்க்களம் நோக்கி விரைந்தார்கள். அந்த போர்க்களத்தில் கூட, வீட்டிற்குத் தீ வைத்தல், பெண்களுக்கு இடர் செய்தல், குழந்தைகளைக் கொல்லுதல், மரங்களை வெட்டுதல் போன்ற மறநெறியைச் செய்திடக் கூடாது என்று தர்ம நெறியோடு போரிடச் சொன்ன பெருமானார் (ஸல்) அவர்கள், தாக்கவந்த மக்கத்து குறைஷியர்களையெல்லாம் புறங்கால் பிடரிபடத் திரும்பியோடச் செய்தார்கள்.
பத்ரு போர்க்களத்தில் இறைவன் தந்த வெற்றி ஏகத்துவத்தின் வளர்ச்சிக்குப் பெரும் துணையாக அமைந்தது.

வளர்ச்சிப் பெற்ற சமுதாயமாக இஸ்லாம் திகழத் துவங்கிய இந்த நேரத்தில் வள்ளல் நபி (ஸல்) அவர்கள் சமுதாயச் சீர்திருத்தத்தில் நாட்டம் கொண்டு இறைவனுடைய மார்க்கமான இஸ்லாத்தில் எல்லோரும் சகோதரர்கள், இதில் ஏற்றத்தாழ்வு பேசுவது இறை நம்பிக்கை உடைய மனிதனுக்கு இழுக்காகும் என்று கூறி சமுதாயத்தைப் பற்றி நின்ற மக்களிடம் உயர்ந்தவர்கள் தாழ்ந்தவர்கள் என்ற பேதத்தை நீக்கினார்கள்.

ஆணுக்குரிய உரிமை பெண்ணுக்கும் உண்டு என்று சட்டம் செய்தார்கள். பின்தங்கிய மக்களை வாட்டி வதைத்துக்கொண்டிருந்த வட்டித் தொழிலை உடைத்தெறிந்து சமுதாயத்தில் புனிதமான ஒரு சூழ்நிலையை உருவாக்கினார்கள்.

தேடிய பொருளில் மிஞ்சுவதில் நாற்பதில் ஒரு பங்கை எளியவர்களுக்குத் தரவேண்டும் என்று கூறிச் சமுதாயத்தில் மலிந்திருந்த வறுமையை நீக்கிப் பொருளாதாரத்தில் புதிய ஒரு சூழ்நிலையை உருவாக்கினார்கள்.

குற்றமற்ற ஒருவனைக் கண்ஜாடை காட்டிக் காட்டிப் பேசுவது கூடக் குற்றமாகும் என்று கூறி, நற்செயல் பெருகிடுவதற்காகப் பாதையை வகுத்தார்கள். உங்கள் மனைவியருக்கு நீங்கள் செய்திட வேண்டிய கடமைகள் சில உண்டு என்று கூறிப் பிற மங்கைகளை நெருங்கும் விபச்சாரத்தின் தீமையை வேருடன் களைந்தார்கள். விதவைகளின் மறுமணத்தைச் சிறப்பாக்கி வைத்து, உலக அரங்கில் ஒரு பெரிய மாறுதலையே உண்டாக்கினார்கள்.

மனதை மயக்கி ஆட்டி வைக்கும் மதுவை நினைத்தும் பார்த்திடாத வகையில் மதுவிலக்குச் சட்டத்தை நிரந்தரமாக்கினார்கள்.

இவற்றைப் போன்ற எண்ணற்ற சமூக சீர்திருத்தங்களைச் செய்த அண்ணல் மாநபியை எதிர்த்துப் போராடிய அரபியர்களின் குரலில் இப்பொழுது புது விதமான ராகம் பிறந்தது.

" எங்களிடம் நபி உண்டு. அவர் பெயர் முஹம்மதாகும் (ஸல்). அவர்களுக்கு நிகர் அவனியில் உண்டோ?.."" என்று உலகத்து மக்களிடம் பெருமிதத்தோடு ஒரு கேள்வியைக் கேட்டார்கள் அராபியர்கள். அதோடு எங்களுக்கு மட்டுமல்ல உங்களுக்கும் மற்றும் படைப்பினங்கள் அனைத்துக்குமே அருட்கொடையாக வந்தவர்கள் நபிகள் நாயகம் (ஸல்), என உலகினருக்கு எடுத்தோதி விளக்கினார்கள்.

சரித்திரம் அறியாத சாதனை புரிந்த செம்மல் நபிகள் நாயகம் (ஸல்) அவர்களின் வழிமுறையில் வாழ்வதற்கு உறுதி கொள்வோமாக! ஆமீன்.

***********

டிஸ்கி:


நபிகள் நாயகம் (ஸல்) அவர்களின் வரலாற்றை எங்க ஹஜ்ரத்து அவர்களின் வழிகாட்டலின் படி எழுதிய கட்டுரை. இந்த கட்டுரை நான் கல்லூரியில் படித்துக் கொண்டிருக்கும்போது கல்லூரி ஆண்டு மலரில் வெளியானது.

***********

Post Comment

பாலங்கள் என்றால் இப்படி இருக்கணுமோ..

அன்புள்ள நண்பர்களே!!.. எல்லோரும் சுகமா.. நலம் நலமறிய ஆவல்.

அறிவியல் முன்னேற்றங்களினால் நம்நாடு பல துறைகளிலும் முன்னேறி வருகின்றது. உதாரணத்துக்கு போக்குவரத்து துறை, இதில் எண்ணற்ற வளர்ச்சி. ஒரு நாட்டின் வளர்ச்சிக்கு போக்குவரத்து மிக இன்றியமையாததாகிறது. ஒரு இடத்திலிருந்து மற்றொரு இடத்துக்கு சென்று தகவல்களை பரிமாறிக் கொள்கிறோம். பணி நிமித்தமாகவும் சொந்தக் காரியங்களுக்காவும் பயணம் அத்தியாவசியமாகிறது. போக்குவரத்து ஊடகங்களான‌ வான்வழி,
நீர்வழி போக்குவரத்து, தரைவழி போக்குவரத்து என்று மக்களின் பயன்பாட்டில் பெரிதும் உதவுகின்றன.

அந்த காலத்தில் மக்கள் பயணப்படுவது என்பது மிகுந்த சிரமமான விசயமாகும். இன்று நமக்கு அறிவியல் கண்டுபிடிப்புகளினால் பயணம் இனிமையானதாகிறது. இப்போது பயணப்ப‌டவேண்டிய இடத்தை குறைவான நேரத்தில் சுகமான பயணத்தில் அடைந்து விடுகிறோம். தரைவழி போக்குவரத்தில் பேருந்து மற்றும் ரயில்வே துறைகள் மிக முக்கிய பங்காற்றுகின்றன. நம்நாட்டில் போக்குவரத்துக்கு பல நல்ல திட்டங்கள் ஒவ்வொரு ஐந்தாண்டு திட்டங்களில் செயல்படுத்தப்பட்டு வருகின்றது.

கடந்த இருபதாண்டில் போக்குவரத்துக்கு இடையூறு இல்லாமல் பயணிக்க நமது அரசு பல தரமான சாலைகளும் பாலங்களும் கட்டிவருகிறது. ரயில்வே துறையிலும் பல முன்னேற்றங்கள். நாட்டின் எந்த இடத்துக்கும் செல்ல ரயில் மற்றும் பேரூந்துகள் இயக்கப்பட்டு வருகின்றது.

இங்கே சவுதி அரேபியாவில் ரயில் போக்குவரத்து என்றால் ஒரே ஒரு வழித்தடம்தான் உண்டு. அது தமாம் - ரியாத் இடையேயான ரயில் பாதை மட்டுமே உள்ளது. மற்ற தொலைதூர இடங்களுக்கு செல்ல உயர்தர சொகுசு வால்வோ பேரூந்துகள் இயக்கப்படுகின்றன. சாலைகளும் பாலங்களும் நல்லமுறையில் பராமரிக்கப்பட்டு வருகின்றது.

இந்தியாவில் தினந்தோறும் வாகனங்களின் எண்ணிக்கை உயர்ந்து வருகிறது. சென்னையில் மட்டும் ஒரு நாளைக்கு சுமார் ஆயிரம் வாகனங்கள் புதிதாக சாலைகளில் ஓடத் துவங்குகின்றன. சென்னையில் சுமார் 31 லட்சம் வாகனங்கள் உள்ளன. இவற்றில் மொபெட், பைக், கார், லாரி, பஸ் போன்ற அனைத்து வகை வாகனங்களும் அடங்கும்.

காலை மற்றும் மாலைகளின் உச்சி நேரங்களில் பெங்களூரு, மும்பை போன்ற நகரங்களில் சாலைகளில் வாகன நெரிசல் கடுமையாக இருந்துவிடுகிறது. பல மணி நேரங்களுக்கு சாலைகள் உறைந்துவிடுகின்றன. இந்த போக்குவரத்து நெரிசலை சமாளிக்க இப்போது நம்நாட்டில் எல்லா சாலைகளும் செப்பனிட்டு அழகான பாலங்கள் கட்டப்படு வருகின்றன.

நம்நாட்டில் உள்ள பாலங்களை பார்த்திருப்பீர்கள். சர்வதேச நாடுகளில் உள்ள சில அதிசயமான பாலங்களை பற்றிய படங்களை சில‌ நண்பர்கள் தங்களது வலைப்பூவில் பகிர்ந்துள்ளார்கள். அதுபோன்ற அழகான பாலங்களின் படங்களை அதன் குறிப்புகளுடன் இங்கே பகிர்ந்து கொள்ளலாம்.

இந்த படங்க‌ளை அனுப்பிய என் நண்பருக்கு நன்றிகள்.

1. பெடஸ்டிரியன் பாலம் டெக்ஸாஸ். Pedestrian Bridge, Texas .


இந்த அழகான ஆர்ச் வடிவிலான பாலம் டெக்ஸாஸ் மாநிலத்தில் உள்ள ஆஸ்டின் ஏரியில் அமைந்துள்ளது. இதை மிரோ ரிவெர்ரா தலைமையிலான திறமைவாய்ந்த கட்டடக்கலை நிபுணர்கள் வடிவமைத்துள்ளனர்.

இந்த பாலம் முக்கிய விருந்தினர் மாளிகையிலிருந்து ஏரியின் மறுகரையில் உள்ள அரசாங்க அதிகாரியின் மாளிகையை இணைக்கிறது. இதனை சுற்றிலும் அழகழகான இயற்கை காட்சிகளினால் இந்த பாலம் பார்ப்பதற்கு ரொம்ப நல்லாயிருக்கிறது.

2. கின்டெய்க்யோ ல்வ்குனி - ஜப்பான். Kintaikyo, Iwakuni, Japan


இந்த பாலம் மிகவும் பழ‌மை வாய்ந்தது. இந்த கின்டெய்க் பாலம் 1673ல் கட்டப்பட்டது. ஆனால் உலகப்போரின் பாதிப்புக்குள்ளனான இந்த பாலத்தை 1950ல் மீண்டும் செப்பனிட்டு கட்டியுள்ளனர். நிஷிகி நதியில் அமைந்துள்ள இந்த பாலத்தில் மிகப்பெரிய ஐந்து வளைவுகள் உண்டு. இவை அனைத்தும் மரங்களினால் கட்டப்பட்டவைகளாகும். இது உயர்தர வயர்களும் கிளாம்புகளினாலும் பிணைக்கப்பட்டுள்ளது.

3. ஜஸ்சிலினோ குபிட்செக் பாலம் - பிரேசிலியா ப்ரேசில். Juscelino Kubitschek Bridge, Brasilia, பிரேசில்


கட்டுமானத் துறையின் புதிய தொழிற்நுட்ப முறையினால் கட்டப்பட்ட இந்த பாலம் ப்ரேசில் நாட்டில் ப்ரேசிலியா என்ற இடத்தில் அமைந்துள்ளது. இது சுருக்கமாக ஜேகே ப்ரிட்ஜ் (JK Bridgஎ ) என்று அழைக்கப்படுகிறது. மிகப்பெரிய மூன்று வளைவுகளை இந்த பாலத்தை பார்க்கும்போது வியப்பில் ஆழ்த்துகிறது.

4. ரோலிங் பாலம் _ லண்டன் யூகே. Rolling Bridge, London, UK


பார்ப்பதற்கு அழகாக தோற்றமளிக்கக்கூடிய லண்டனில் உள்ள இந்த பாலம் சுருள்போல வடிவமைக்கப்பட்டுள்ளது. இந்த ரோலிங் பாலம் தாமஸ் ஹீதர்விக்ஸ் விருதினை கட்டுமானத்துறையின் புதிய தொழில்நுட்பமான கேனலுக்காக‌ பெற்றுள்ளது.

இதனை ஹைட்ராலிக் ஜாக் மூலம் கப்பலில் எடுத்துச் செல்லலாம்.

5. பெய்பாஞியங் ரயில்வே பாலம் _ ஹூச்கோ - சீனா. Beipanjiang River Railroad Bridge, Guizhou, சீனா


சீனாவில் பெய்பாஞியங் ரிவர் ரயில்வே பாலம் ஹூச்கோ என்ற இடத்தில் இரண்டு மலைகளை இணைக்கும்விதமாக வடிவமைக்கப்பட்டு உள்ளது. இந்த பாலம் சீனாவில் உள்ள வறுமையில் வாடுபவர்கள் வசிக்கும் இடங்களை இணைக்கிறது.

இதன் உயரம் தரையிலிருந்து 918 அடியாகும். இது உயரமான பகுதியாகும்.

6. ஹென்டர்சன் வேவ்ஸ், சதன் ரிட்ஜெஸ் - சிங்கப்பூர். Henderson Waves, Southern Ridges, Singapore .


சிங்கப்பூரில் உள்ள இந்த பாலம் மிக உயரமான பெடரஸ்டியன் பாலம் சதன் ரிட்ஜெஸ் பகுதியில் அமைந்துள்ளது. 9 கி.மீ நீளமான இந்த பாலத்தை சுற்றிலும் அழகழகான மரங்களும் பார்க்குகளும் தோட்டங்களும் அமைக்கப்பட்டுள்ளது. பாலோவ் வகையான ஆயிரக்கணக்கான மரப்பலகைகளை கொண்டு வடிவமைக்கப்பட்டுள்ளது.

இதனை பற்றி மேலும் தகவல்களை சிங்கப்பூரில் வசிக்கும் நண்பர்கள் சொல்வார்கள்.

7. பான்ட் கஸ்டேவ் ஃப்லோபர்ட், ருவ்ன், ஃப்ரான்ஸ். Pont Gustave Flaubert, Rouen, பிரான்ஸ்


ப்ரான்ஸில் ரூவ்ன் என்ற இடத்தில் அமைந்துள்ள இந்த பாலம் 1200 டன் எடையை கொண்டுள்ளது. செங்குத்தான இரு உருளைகளான தூண்களை தாங்கிய இந்த பாலம் பார்க்க மிக அழகாக உள்ளது. இதன் ஒவ்வொரு பகுதியும் 180 அடி உயரமும் 405 டன் எடையையும் கொண்டுள்ளது.

8. மில்லொவ் வியடக்ட் - ப்ரான்ஸ். The Millau Viaduct –.


ஃப்ரான்ஸில் உள்ள இந்த பாலம் உலகின் அதிக உயரமான பாலம். The Millau Viaduct –ங்குற பாலம்தான். இதனோட நீளம் மட்டும் 2,460 m (8,071 ft), அகலம் 32 m (105 ft) னா பாத்துக்குங்க…

9. ஜெஜ்ஜியோ ஜார்ஜ் பாலம் ‍_ Hegigio Gorge Pipeline Bridge, Southern Highlands Province, Papua New Guinea .



அதிசயமான இந்த பாலத்தை இரண்டு பைப்லைன் குழாய்கள் தாங்குகின்றன என்றால் வியப்பாக இருக்கிற‌தல்லவா... ஒரு பைப்லைனில் கேஸ்ஸும் இன்னொன்றில் ஆயிலும் கொண்டது. இது பப்புஅ என்ற பகுதியில் உள்ளது.

தரைமட்டத்திலிருந்து மிக உயரமான பகுதியில் பைப்லைன்களை மட்டுமே கொண்டுள்ள இந்த பாலத்தின் உயரம் 1290 அடியாகும்.

மேலும் இந்த பாலங்களை பற்றிய தகவல்களை அந்தந்த நாடுகளில் உள்ள நண்பர்கள் சொல்வார்கள் என்று நினைக்கிறேன்.

படங்களை பெரிதாக்கி (டபுள் கிளிக் செய்து) காணுங்கள்.

இந்த தகவல்களுடன் படங்களை அனுப்பிய என் நண்பருக்கு நன்றிகள்.

நன்றியுடன் உங்கள் ஸ்டார்ஜன்.

,

Post Comment

இசை எனும் இன்பவெள்ளத்தில்...

ச..ரி..க..ம..ப..த..நீ.. சரிகமபதநீ.. என்ன இது ஸ்டார்ஜன் இசை கத்துக்கிறாரா என்று நீங்க கேட்பது எனக்கு கேக்குது.. ஆஹா! என்னப்பொருத்தம் நமக்குள் இந்த பொருத்தம்.. என்பது போல தமிழருக்கும் இசைக்கும் அப்படி ஒரு பொருத்தம். இசை என்பது இனிமையான ஒலி. இசை, மனதை லயிக்கவைத்து தன் வசப்படுத்தும். இசைக்கு மயங்காதோர் யாரும் கிடையாது என்றுகூட சொல்லலாம். நாம் மட்டுமில்லாமல் அந்த காலத்திலே சங்ககால தமிழர்களும் இசைக்கு முக்கியத்துவம் கொடுத்திருந்தார்கள். இசை அனைவரையும் கட்டிப்போடும் ஒரு வசீகரன்.

சங்ககால இலக்கியங்களிலும் இசை முக்கிய இடத்தை பிடித்திருந்தது. அதனால்தான் சங்ககால இலக்கியங்களை இயல் இசை நாடகம் என்ற மூன்று வகைகளாக பிரித்திருந்தனர். இசையை இனிமையாக வெளிப்படுத்தும் கருவிகள் இசைக்கருவிகள் என்று அழைக்கப்படுகின்றன.

இசை ஆய்வாளர்களின் கருத்துப்படி இசைக்கு ஐந்து கருவிகளால் உரிய ஓசைகள் உண்டாகின்றன. அந்தகால இசைக்கருவிகளை ஐந்து வகையாக பிரிக்கலாம்.

அவைகள்: தோல்கருவிகள், துளைக்கருவி, நரம்புகருவி, கஞ்சக்கருவி, மிடறு என்பனவாகும்.

தோல் கருவிகள்:

இந்த வகை இசைக்கருவிகள் மரத்தினால் செய்யப்பட்டு தோலினால் கட்டப்பட்டவை.

பெரும்பறை, சிறுபறை, பேரிகை, படகம், இடக்கை, உடுக்கை, மத்தளம், சல்லிகை, கரடிகை, திமிலை, குடமுழா, தக்கை, கணப்பறை, தமடூகம், தண்ணுமை, தடாரி, அந்தரி, முழவு, சந்திர வலையம், மொந்தை, முரசு, நிதாளம், கண்விடுதூம்பு, துடுமை, அடக்கம், தகுணிச்சம், விரலேறு, பாகம், உபாங்கம், துடி, நாளிகைப்பறை.

மத்தளம்

இதற்குத் தண்ணுமை என்றும், மிருதங்கம் என்றும் பெயர்கள் உள்ளன. மத்து என்பது ஓசைப்பெயர். தளம் என்பது இசையிடனாகிய கருவிகளுக்கெல்லாம் தளமாக இருப்பது. ஆதலால் மத்தளம் என்று பெயர் பெற்றது.

குடமுழா

தோற்கருவிகளில் ஒன்றாகக் கூறப்படும் குடமுழா என்பது ஐந்துமுக வாத்தியம் என்று இப்போது கூறப்படுகிறது.இது இப்போது இசைப்பாட்டில் வாசிக்கப்படாமல் மறைந்து விட்டது.

தவுல்

இது நாதசுரத்துடன் வாசிக்கப்படுகிற தோற்கருவி. அந்த காலத்தில் இதன் பெயர் மட்டூகம் என்றும் சொல்வார்கள்.

பதலை

இது தோற்கருவி இன்றைக்கு தபலா என திரிந்து வழங்குகிறது. சங்ககாலத்தில் பயன்படுத்தப்பட்டு பிற்காலத்தில் மறைந்துவிட்டது. ஆனால் வடநாட்டில் தபலாவாக புகழ்சூடி இன்றும் இருக்கிறது.

முரசு

இது ஒரு ஒலிக்கருவி. இது அரைக்கோள வடிவத்தில் பெரிதாக இருக்கும் தோல்கருவி. அந்தகாலத்தில் அரசர்களின் ஆணையை மக்களுக்கு அறிவிக்க பயன்பட்ட ஒரு தோல்கருவி. இன்றும் சில ஊர்களில் இருக்கிறது. பள்ளிவாசல்களில் மின்சாரம் இல்லாத நேரத்தில் முரசு அறிவித்து மக்களை தொழுகைக்கு அழைப்பார்கள்.

துளைக்கருவிகள்

இந்த வகை இசைக்கருவிகள் துளைகளின்மூலம் காற்றின் வழியாக இசையை தருவிக்கும் கருவிகள் துளைக்கருவிகள் எனலாம்.

* புல்லாங்குழல்
* முகவீணை
* மகுடி
* சங்கு
* தாரை
* கொம்பு
* எக்காளை
* எஆசருஅம்

புல்லாங்குழல்

இது மிகவும் தொன்மையான வரலாற்றையுடைய ஒரு இசைக்கருவி. உலகின் எல்லாப் பாகங்களிலும் காணப்படும் இது துளைக்கருவி (aero phones) வகையைச் சேர்ந்தது.

புல்லாங்குழல், புல் இன வகையான மூங்கில் "மரத்தினால்" செய்யப்படுகின்றது. இதனால் இதற்குப் புல்லாங்குழல் என்று பெயர் ஏற்பட்டது. இளமையும் மூப்புமின்றி நடுவளர்ச்சியுடைய மூங்கில் மரத்தை வெட்டி நிழலிலே ஒராண்டு காலம் வைத்து அதிலிருந்து குழல் செய்வர். சீரான விட்டமுடைய ஒடுங்கிய மூங்கில் குழாயில், வாயினால் ஊதிச் இசையொலி எழுப்புவதற்காக நுனியில் ஒரு துளையும், விரல்களால் மூடித்திறப்பதன் மூலம் இவ் இசையொலியை வெவ்வேறு சுரங்களாக மாற்றி எழுப்ப உதவும் குறிப்பிட்ட எண்ணிக்கையுடைய பல்வேறு துளைகளையும் கொண்ட எளிமையான கருவியாக இது இருப்பதால், சமுதாயத்தின் எல்லாத் தரப்பிலுள்ளவர்களுக்கும் இலகுவில் கிடைக்கக்கூடியதாக இருக்கும் கருவி.

இந்தியாவின் பழைய இலக்கியங்களிலே இக்கருவியைப்பற்றிய ஏராளமான குறிப்புக்கள் உண்டு. தமிழின் சங்க இலக்கியங்களும் குழல் பற்றிப்பேசுகின்றன. சிலப்பதிகாரத்தில் உள்ள ஆய்ச்சியர் குரவையிலே கொன்றைக்குழல், ஆம்பர் குழல், முல்லைக்குழல் என 3 வகைக் குழல்களைப்பற்றிக் கூறப்பட்டுள்ளது.


நரம்புக் கருவிகள்

* யாழ்
* வீணை
* தம்பூரா
* கோட்டுவாத்தியம்
* சாரங்கி9

யாழ்

இது மிகவும் பழமையான இசைக்கருவி. இது யாளி என்ற ஒரு பூர்வகால மிருகத்தின் தலையைப் போல் செய்யப்பட்டிருந்ததால் யாழ் என்று பெயர் பெற்றது.

வேட்டைக்கு செல்லும் மக்களின் பயன்பாட்டில் இருந்த கருவிகளின் ஒன்று வில். வில்லில் முறுக்கேற்றிக் கட்டப்பெற்ற நாணிலிருந்து அம்பு செல்லும்பொழுது தோன்றிய இசையே யாழின் உருவாக்கத்திற்கு மூல காரணம் என்று சொல்கிறார்கள். இந்த வில்லே வில்யாழாக மலர்ந்தது.

சங்ககால இலக்கியங்களில் யாழுக்கு முக்கிய இடம் உண்டு. சங்க இலக்கியங்களான புறநானூறு, கலித்தொகை, பரிபாடல் மற்றும் ஆற்றுப்படை நூல்களிலும், திருக்குறளிலும் சிலப்பதிகாரம், பெருங்கதை, சீவகசிந்தாமணி முதலிய காப்பியங்களிலும் பக்தியிலக்கியங்களிலும் யாழ் பற்றிய செய்திகள் இடம் பெற்றுள்ளன.

யாழில் 4 வகைகள் உண்டு.... பேரியாழ், சீறியாழ், மகரயாழ், சகோடயாழ்.

வில்யாழ், பேரியாழ் (21 நரம்புகள்), சீறியாழ் (9 நரம்புகள்), என்பன சங்ககாலத்திலும், மகரயாழ் (17 (அ) 19 நரம்புகள்), சகோடயாழ் (14(அ) 16 நரம்புகள்), செங்கோட்டு யாழ் (7 நரம்புகள்) என்பன காப்பியக் காலங்களிலும் இருந்திருக்கின்றன.

வீணை

வீணை ஒரு நரம்பு இசைக்கருவி. மிக அழகிய இசைக்கருவியான இது மிகவும் பிரபலம் வாய்ந்தது. இந்திய இசையின் பல நுட்பங்களையும், தத்துவங்களையும் இந்தக் கருவியின் மூலம் தெளிவாக வெளிப்படுத்தலாம்.

வீணையின் பாகங்கள்

குடம், மேற்பலகை, தண்டி, மாடச்சட்டம், சுரைக்காய், பிரடைகள், யாழிமுகம், மேளச்சட்டம், மெழுகுச்சட்டம், 24 மெட்டுக்கள், குதிரைகள், லங்கர், நாகபாசம் ஆகியவை வீணையின் பாகங்களாகும்.

கஞ்சக்கருவிகள்

* கரம்

மிடறு கருவிகள்

* கற்தூண்கள் இசை.

அந்தகாலத்தில் இந்த மாதிரியான இசைக்கருவிகள் மக்களிடையே பயன்பட்டிருக்கின்றன. இப்போது அவை காலத்தால் மறைந்து விட்டன. சில வகையான இசைக்கருவிகள் இன்றும் பல ஊர்களில் இருக்கலாம்.

அவை நம்ம தாத்தா பாட்டி கால பொக்கிஷங்கள். ஆனால் இன்று அதன் இருப்பிடமோ பழைய சாமான்கள் வைக்கும் ஸ்டோர் ரூம் என்று சொல்லப்படும் அரங்கு வீட்டில் தூசியோடு தூசியாக இருக்கின்றன.

இப்போவெல்லாம் மேற்கத்திய இசைகள் நம்மை ஆட்டிவைக்கின்றன. அதிலிருந்து வரும் இரைச்சல் தான் நம் காதை அதிரவைக்கின்றன. நம்முடைய காது 120 டெசிபல் அளவு சத்தத்தைதான் உள்வாங்கும் என்று சொல்லப்படுகிறது. இசையென்ற பெயரால் வரும் இரைச்சல் ஒலிகள் நம் காதுகளை தாக்காதவண்ணம் நாம்தான் பாதுகாத்துக் கொள்ளவேண்டும்.

நம்முடைய அருகாமையில் நிறைய அந்தகால பொக்கிஷங்கள் இருக்கலாம். அவற்றை பாதுகாத்து இனிமையான இசையினை கேட்டு மகிழுங்கள்.

,

Post Comment

கயத்தாரிலிருந்து கட்டபொம்மனும் நானும்

அழகிய வீரபாண்டியபுரம் எனும் ஊரில் (இன்றைய ஒட்டபிடாரம்) நாயக்கர் வம்சத்தில் ஆட்சிபுரிந்தவர் ஜெகவீர பாண்டியன். இவரிடம் அமைச்சராக இருந்த தெலுங்கை பூர்வீகமாக‌ கொண்ட‌ கெட்டிபொம்மு (வீரம் மிகுந்தவர்) என்பவரின் பரம்பரையில் வந்தவர் வீரபாண்டிய கட்டபொம்மன். கட்டபொம்மனின் இயற்பெயர் வீரபாண்டியன்.

ஜனவரி 3 1760 அன்று ஆறுமுகத்தம்மாள் - திக்குவிசய கட்டபொம்மு தம்பதியருக்கு, பாஞ்சாலங்குறிச்சியில் பிறந்தவர் வீரபாண்டிய கட்டபொம்மன். பெப்ரவரி 2, 1790 அன்று 47 வது பாளையக்காரராகப் பொறுப்பு ஏற்றுக்கொண்டார். இவர் 9 ஆண்டுகள், 8 மாதம், 14 நாட்கள் அரசுப் பொறுப்பிலிருந்தார்.

அந்த காலகட்டத்தில் வணிகம் செய்ய நம்நாட்டுக்கு வந்த ஆங்கிலேயர் கொஞ்சம் கொஞ்சமாக வேரூன்றத் தொடங்கினர். நம்நாட்டை தந்திரமாக ஆங்கிலேயர் தங்கள் வசமாக்கிக் கொண்டனர். எல்லா அரசர்களும் கிழக்கிந்திய கம்பெனிக்கு கப்பம் கட்டவேண்டும் என்று கி.பி. 1793ல் ஆங்கிலேயர் சட்டம் கொண்டு வந்தனர். இதற்கு நாட்டின் பலபகுதிகளிலிருந்து மன்னர்கள், நம்நாட்டை வெள்ளைக்காரன் அடிமைப்படுத்துவதா என்று வெகுண்டெழுந்தனர். தமிழ்நாட்டிலும் பல மன்னர்கள் தங்கள் எதிர்ப்புகளை தெரிவித்தனர்.

கட்டபொம்மன் திருநெல்வேலி பாளையத்துக்காரகளை ஒன்றுதிரட்டி ஆலன்துரையை எதிர்த்து போரிட்டார். இந்தபோரில் ஆங்கிலேயர் தோற்று ஓடினர். பின்னர் நெல்லை கலெக்டராக இருந்த ஜாக்சன் துரையுடனான சந்திப்பு பயனளிக்காமல் போகவே வெள்ளையர்கள் பாஞ்சாலங்குறிச்சி கோட்டையை முற்றுகையிட்டனர். அங்கிருந்து தப்பிய கட்டபொம்மன் புதுக்கோட்டை மன்னரிடம் தஞ்சமடைந்தார். அக்டோபர் 1, 1799 இல் எட்டப்பனால் காட்டிகொடுக்கப்பட்டு புதுக்கோட்டை மன்னன் தொண்டைமானின் உதவியுடன் ஆங்கிலேயர்கள் கட்டபொம்மனை கைதுசெய்து கயத்தாறுக்கு கொண்டு வந்தனர்.

அக்டோபர் 16 1799 இல் ஆங்கிலேயத் தளபதி பேனர்மேன் ஆணைப்படி கயத்தாற்றில் தூக்கிலிடப்பட்டார். கயத்தாறில் அவர் தூக்கிலிடப்பட்ட இடத்தில் இன்று ஒரு நினைவுச்சின்னம் உள்ளது.

************************************

வீரபாண்டிய கட்டபொம்மனை பற்றி சிறுவயதில் பாடபுத்தகங்களில் படிக்கும்போது பெருமையாக இருக்கும். அப்போதே என்மனதை கவர்ந்தவர் கட்டபொம்மன். என்னுடைய சிறுவயதில் கயத்தாற்றில் இருக்கும் எங்க நன்னி (அம்மம்மா) வீட்டுக்கு அடிக்கடி செல்வோம். கட்டபொம்மனை இங்கேதான் தூக்கிலிட்டார்கள் என்று படித்திருக்கிறேன். ஆனால் ஒருதடவை கூட அந்த இடத்தை அப்போது பார்த்ததில்லை.

கயத்தாரிலுள்ள கட்டபொம்மன் சிலை. இதுதான் கட்டபொம்மன் தூக்கிலிடப்பட்ட இடம்.


ஒருநாள் எதோ ஒரு ஊருக்கு சென்றுவிட்டு வரும்போது நன்னி, "எல சேக் இதுதான் கட்டபொம்மன் தூக்குலபோட்ட இடம். பார்க்கணும் பார்க்கணும் என்று சொல்லுவியலே நல்லா பாத்துக்கோ" என்று காட்டும்போதுதான் தெரிந்தது. இதன்பின்னர் கட்டபொம்மன் என்னை ரொம்பவே ஈர்த்துவிட்டார். நெல்லையில் பாளையங்கோட்டை பேரூந்து நிலையத்துக்கு அருகிலும் கட்டபொம்மன் சிலை உண்டு.

சிறுவயதில் கயத்தாரில்தான் நான் சைக்கிள் ஓட்ட கத்துக்கொண்டேன். அங்கே உள்ள சைக்கிள்கடையில் வாடகைசைக்கிள் ஒரு மணிநேரத்துக்கு 50பைசா. சைக்கிள் கடைக்குசென்று எங்கமாமா பேரச்சொல்லுவேன். உடனே கடைக்காரர் "பத்திரமாக ஓட்டு என்ன".. என்றுசொல்லி சைக்கிளை கொடுப்பார். மாமாவிடமிருந்து "ரோட்டுப்பக்கமெல்லாம் போகக்கூடாது" என்று கண்டிப்புடன் அனுமதி கிடைக்கும். நான் எங்கசொந்தக்கார பையனை சேர்த்துக்கொண்டு கட்டபொம்மன் சிலை, குட்டிகுளம், பன்னீர்குளம் என்று மாமாவுக்கு தெரியாமல் சுத்துவேன்.

மாமாவிடம், "மாமா கட்டபொம்மன் தூக்கிலிட்ட இடத்தில் எப்படிமாமா சிலை வந்தது?" என்று கேட்டேன்.



அதற்கு மாமா, "இந்தஇடம் ஆரம்பத்தில் வெறும் தரையாகத்தான் இருந்தது. இந்த இடத்தின் மகிமையை தெரிந்து கொண்ட நடிகர் சிவாஜி கணேசன்தான் இந்த இடத்தை வாங்கி அதில் வீரபாண்டிய கட்டபொம்மன் சிலையை நிறுவினார். சிலை திறப்பு விழா 1970-ம் வருடம் ஜூலை மாதம் 16-ம் நாள் நடைபெற்றது. சஞ்சீவ ரெட்டி தலைமை வகிக்க பெருந்தலைவர் காமராஜர் கட்டபொம்மன் சிலையை திறந்து வைத்தார்" என்று மாமா சொன்னபோது பிரமிப்பாக இருந்தது.

மாமா, "கட்டபொம்மனை விசாரணை நடத்தி சிறையில் வைத்திருந்த கட்டடம் போலீஸ் நிலையத்துக்கு பின்னால் உள்ள சந்தைக்கு போகும் தெருவில் உள்ளது. ஆனால் அது இப்போது ரொம்ப சேதமடைந்து உள்ளது" என்றார்.


பாஞ்சாலங்குறிச்சியின் நுழைவாயில். இதிலிருந்து ஒரு கிலோமீட்டர் தொலைவில் கட்டபொம்மனின் கோட்டை உள்ளது.



இதனால் எனக்கு ரொம்ப ஆவலானது. அப்படியானால் பாஞ்சாலங்குறிச்சி கட்டபொம்மன் கோட்டையை பார்க்கவேண்டும் என்ற ஆவல் அதிகமானது. அப்போதைய சூழ்நிலையில் பாஞ்சாலங்குறிச்சிக்கு செல்வது இயலாத காரியமாக இருந்தது. இருந்தாலும் என்றாவது ஒருநாள் பாஞ்சாலங்குறிச்சி கோட்டையை பார்த்துவிட வேண்டும் என்ற ஆவல் மட்டும் மாறவே இல்லை.


பின்னர் மாமாவீட்டுக்கு கயத்தாறுக்கு போகும்போதெல்லாம் கட்டபொம்மன் சிலையை பார்க்க தவறுவதில்லை. கல்லூரி படிப்பு முடித்தபின், இந்தகாலத்தில் படித்த படிப்புக்கு ஏத்தமாதிரி எங்கே வேலை கிடைக்குது?.. வீட்டு கஷ்டசூழ்நிலையினால் வேலையை தேடியதில் நிரந்தரமில்லா வேலைதான் மிஞ்சியது. கிடைத்த வேலைகளில் என்னை ஈடுபடுத்திக் கொண்டேன். கயத்தாற்றில் மாமாவுக்கு தெரிந்தவர் டிவிஎஸ் (இருசக்கர வாகன விற்பனை) டீலர்ஷிப் வாங்கினார். அப்போது மாமா, அவரிடம் என்னை வேலைக்கு சேர்த்துவிட்டார். அங்கே எனக்கு அசிஸ்டெண்ட் மேனேஜர் வேலை கிடைத்தது.

கயத்தாறில் வேலை கிடைத்ததால் தினமும் வீட்டுக்கு நெல்லை செல்ல முடியாததால் மாமாவீட்டிலே தங்கியிருந்து வேலை பார்த்தேன். எங்களுக்கு தூத்துக்குடியில் உள்ள நெல்லை டிவிஎஸ் தான் டிஸ்ரிபியூட்டர். அதனால் தினமும் அல்லது இரண்டு நாள்களுக்கு ஒருமுறை அலுவலக வேலையாக தூத்துக்குடி, நெல்லை செல்லவேண்டியிருந்தது. இருசக்கர வாகனத்தில்தான் தூத்துக்குடிக்கு செல்வதுண்டு.

இப்போதைய பாஞ்சாலங்குறிச்சி கோட்டையில் உள்ளே இருக்கும் கட்டபொம்மன் நினைவகம்.


அந்த பகுதியில் உள்ள அனைத்துபகுதியும் எனக்கு அத்துப்படி. இந்தநேரத்தில்தான் என்விருப்பமான பாஞ்சாலங்குறிச்சி கோட்டையை பார்க்கும்வாய்ப்பு கிடைத்தது. கயத்தாரிலிருந்து தூத்துக்குடி செல்லும் பாதையில்தான் பாஞ்சாலங்குறிச்சி இருந்தது எனக்கு மகிழ்ச்சியாக இருந்தது. போகும்போதெல்லாம் குறைவான தூரம் கொண்ட வேறவழி இருந்தாலும் பத்துநிமிசமே அதிகம்எடுக்கும் இந்த வழியில் வருவேன்.

பாஞ்சாலங்குறிச்சி கோட்டையை செப்பனிட்டு புதிய கோட்டை மதில்சுவர்கள் நினைவகம், அருங்காட்சியகம் விளையாட்டு திடல் எல்லாம் அந்த கோட்டையில் உண்டு. இந்த கோட்டையை 1974ல் அப்போதைய முதல் அமைச்சர் டாக்டர் கலைஞர் கருணாநிதி அவர்கள் திறந்துவைத்தார். இப்போதும் பாஞ்சாலங்குறிச்சியில் ஆண்டுதோறும் மே மாதம் 14ம் தேதி மற்றும் 15ம்தேதி கட்டபொம்மன் விழா நடைபெறும். இந்தவிழாவில் தூத்துக்குடிமாவட்ட கலெக்டர் மற்றும் அரசு அதிகாரிகள் கலந்து கொள்வார்கள்.

ஆனால் அரசியல்வாதிகள் ஏதோ ஒரு காரணத்துக்காக இந்தவிழாவில் கலந்து கொள்வதை தவிர்ப்பதாக செய்திகள் கூறுகின்றன.

இப்போது விடுமுறையில் சென்றதும் கயத்தார் சென்றிருந்தேன். நான், என்மனைவி, தங்கை தம்பிகள், மாமா பசங்கள் என்று எல்லோரும் கட்டபொம்மன் சிலையை காண சென்றோம். வீட்டிலிருந்து 1 கிலோமீட்டர் தொலைவில் நெல்லை டூ மதுரை தேசிய நெடுஞ்சாலையில் அமைந்துள்ளது. இப்போது கயத்தார் பேரூராட்சியின் கட்டுப்பாட்டில் இருக்கும் கட்டபொம்மன் சிலை அமைவிடத்தில் சிறுபூங்காவும், குடிநீர்வசதிகள் அமைத்து நல்லமுறையில் பராமரித்து வருகிறார்கள்.


***********************************

அன்பு நண்பர்களே!! இந்த கட்டுரையை யூத்புல் விகடனுக்கு அனுப்பியிருந்தேன். அவர்கள் இந்த கட்டுரையை பாராட்டி குட்பிளாக்ஸ் பகுதியில் முக்கியத்துவத்துடன் இணைக்கப்படும் என்று அறிவித்திருக்கிறார்கள்.

குட்பிளாக்ஸ் பகுதியில் தேர்ந்தெடுத்த யூத்புல் விகடனுக்கு என் நன்றிகளை தெரிவித்துக் கொள்கிறேன்.

,

Post Comment

தமிழா தமிழா ...

தமிழ் எங்கும் தமிழ் எதிலும் தமிழ் . தமிழ் என்ற வார்த்தையை உச்சரிக்கும் போதே எவ்வளவு இனிமையாக உள்ளது . இப்போது எல்லோருக்கும் பிற மொழி மோகங்கள் நம்மை ஆர்ப்பரிக்க தொடங்கியுள்ளது . தமிழில் எத்தனை நூல்கள் உள்ளது . அதனை பாதுகாக்கிறோமா என்றால் இல்லையெனலாம் . தமிழனாக இருந்தால் மட்டும் போதாது . தமிழை பாதுகாக்க வேண்டும் . தமிழில் உள்ள நூல்களை பாதுகாக்க நம்மால் ஆன சிறு முயற்சி மேற்கொள்ள வேண்டும் .

தமிழ் இலக்கிய நூல்களை பத்தி நாம் அறிந்து கொள்வதற்கு நான் இங்கே தொகுத்து தந்துள்ளேன் .


தமிழ் இலக்கியம் பலவகைப்படும். அவை, பத்துப்பாட்டு, எட்டுத்தொகை, பதினெண் கீழ்க்கணக்கு, ஐம்பெருங்காப்பியம், தொண்ணூற்றாறு வகைப் பிரபந்தம் , மருத்துவ நூல்கள் எனப்படும் சித்தர் எழுதிய இலக்கிய நூல்கள் என விரிவடைந்து இலக்கிய வகையின் எண்ணிக்கை நீண்டு கொண்டே போகிறது . காலத்துக்கு ஏற்ப கருத்துகள் வளர்ந்து கொண்டே வருவதைப் போல இலக்கிய வளர்ச்சியும் நிகழ்ந்து கொண்டேயிருக்கிறது.

கிறிஸ்து பிறப்பதற்கு முந்தைய காலத்தையே தமிழ் இலக்கியத்தில் சங்க காலம் என்று குறிப்பிடுகிறார்கள்.

தொன்மையான தமிழ் மொழிகளின் மிக மூத்த நூல் அகத்தியர் எழுதிய அகத்தியம் என்று கூறப்படுகிறது.

இலக்கியம் தோன்றியபிறகே அதனை ஒழுங்குபடுத்த இலக்கணம் தோன்றி இருக்கமுடியும் என்பதால், அகத்தியத்திற்குமுன்னரே தமிழில் சிறப்பான இலக்கிய நூல்கள் இருந்திருக்க வேண்டும் .

இப்போது நமக்குக் கிடைத்திருக்கிற மூத்த தமிழ் நூல் தொல்காப்பியமே. இதுவும் இலக்கண நூல்தான்.

[ கி.மு.300 - கி.பி 100. இந்தக் காலக்கட்டத்தில் தமிழ்ச் சங்கம் அமைத்து தமிழ் வளர்க்க முற்பட்டனர் தமிழ் அறிஞர்கள். அப்போது தோன்றியவையே சங்கம் இலக்கியம் என்று வழங்கப்படுகிறது.அதோடு
இக்காலக் கட்டம் கடைச் சங்ககாலம் எனப்படுகிறது]

சங்க இலக்கியம்

சங்க இலக்கியத்தை மூன்று வகையாகப் பிரிக்கலாம்.

1. பத்துப் பாட்டு.
2. எட்டு தொகை.
3. பதினெண் கீழ்க்கணக்கு.

பத்துப் பாட்டு

இவற்றில் பத்துப்பாட்டு ஒரு தனிப்பட்ட நூல் அல்ல. பல நூல்களின் தொகுப்பு.

மொத்தம் எட்டுப் புலவர்கள் எழுதிய பாடல்கள் பத்தைத் தொகுத்து பத்துப்பாட்டு என்று கூறினர். இவற்றில் ஒவ்வொரு பாட்டும், தனி நூல் என்று சொல்லத்தக்க அளவில் முழுமையானவை. இந்தப் பாடல்கள் ஒவ்வொன்றும் 100 அடிகளுக்கு மேலானவை. 500 அடிகள் வரை கூட சில போகும், சில பத்துப்பாடல்கள் .

முருகு, பொருநாறு, பான் இரண்டு, முல்லை, பெருகு, வளமதுரைக் காஞ்சி,
மருவினிய கோலநெடுநல் வாடை, கோல் குறிஞ்சி, பட்டினப் பாலை,
கடாத்தொடும் பத்து

அதாவது,

திருமுருகாற்றுப்படை, பெரும்பாணாற்றுப் படை, சிறுபாணாற்றுப் படை,
பொருநாற்றுப்படை, முல்லைப்பாட்டு, மதுரைக் காஞ்சி, நெடுநல்வாடை,
குறிஞ்சிப்பாட்டு, பட்டினப்பாலை, மலைபடுகடாம்....
ஆகிய 10 நூட்கள் 10 பாட்டு.

எட்டுத் தொகை.

எட்டுத் தொகை நூற்களும், பல புலவர்கள் இயற்றிய பாடல்களின் தொகுப்பே, ஆனால், இவற்றுள் எந்தப் பாடலையும் ஒரு தனி நூலாகக் குறிப்பிடமுடியாது. 100 அடிகளுக்குக் கீழ்ப்பட்ட இந்த
எட்டுத் தொகை நூலக்ளை ஒரு பழம்பாடல் இப்படி விவரிக்கிறது.

நற்றிணை, நல்ல குறுந்தொகை, ஐயகுறுநூறு பதிற்றுப்பத்து, பரிபாடல்
கலித்தொகை, அகநானூறு, புறநானூறு...., ஆகியவை இந்த 8 நூல்கள் ஆகும்.

பதினெண் கீழ்க்கணக்கு.

கி.பி. மூன்றாம் நூற்றாண்டில் களப்பிரர்கள் என்போர் பாண்டிய நாட்டின் மீது படையெடுத்து பாண்டியர்களை வென்று மதுரையைத் தலைநகராகக் கொண்டு ஆட்சி புரிந்தனர். இவர்கள் காலத்தில்தான் முச்சங்கத்தின் கடைசியான கடைச்சங்கம் அழிந்தது. தமிழர்களின் கலை,
கலாச்சாரம், நாகரிகம் நசிய தலைப்பட்டது. தமிழகத்தின் இருண்ட காலம் என்பார்கள்.
இதனை 'சங்கம் மருவிய காலம்' என்பார்கள்.அப்போது தோன்றிய நூல்கள் பதினெண்கீழ்க் கணக்கு என்று அழைக்கப்படுகிறது.

ஐந்தோ அல்லது அதற்கு கீழோ அடிகளைக் கொண்டு அமையப் பெற்றவை கீழ்க்கணக்கு நூல். அதற்கு மேற்பட்ட அடிகளைக் கொண்டவை மேற்கணக்கு நூலகள் . மேற்கணக்கு நூல்களைக் கொண்டவை மேற்கணக்கு நூல்கள்.(பத்துப்பாடல், எட்டுத்தொகை)

அறம்,பொருள், இன்பம் ஆகிய மூன்றையோ அல்லது மூன்றில் ஒன்றையோ விளக்கி வெண்பாவில் எழுதப்படுவது கீழ்க் கணக்கு நூல்கள்.
நாலடி, நான்மணி,நாநாற்பது ஐந்திணை, முப்பால்,கடுகம், கோவை. பழமொழி -மாமூலம் இன்னிலை சொல் காஞ்சியோடு ஏலாதி என்பதும் கைநீலையுமாம் கீழ்க்கணக்கு.

(பதிணெண் கீழ்க்கணக்கு நூல்களில் திருக்குறளைச் சொல்வது உண்டு.
அது பற்றிய குறிப்பைக் காணவில்லை.ஒருவேளை முப்பால் எனச் சொல்லப்
பட்டிருப்பதால் இருக்கலாம்?)

நாலடியார், நான்மணிக் கடிகை, இன்னா நாற்பது, இனிவை நாற்பது, திரிகடுகம், ஏலாதி
முதுமொழிக் காஞ்சி, முப்பால், ஆசாரக்கோவை, பழமொழி, சிறுபஞ்ச மூலம் ஆகிய 11
அற ஒழுக்க நூல்களும்,

ஐந்திணை ஐம்பது, ஐந்திணை எழுபது, திணை மாலை நூற்றைம்பது, கைந்நிலை, கார்நாற்பது, களவழி நாற்பது ஆகிய 7 அகத்துறை (காதல்) நூல்களும் சேர்த்து 18 நூல்கள் பதினென்கீழ்க்கணக்கு நூல்களாக வருகின்றன. இவையே சங்க கால நூற்கள்.


செய்யுள் இலக்கியம்

காகிதமும் அச்சு இயந்திரமும் இல்லாத காலத்தில், ஓலைச் சுவடிகளில் எழுதிப் படிப்பதும், சுவடிகளைப் பேணிக் காப்பதும் கடினமானதாக இருந்தது. செய்யுள் வடிவங்களைப் பெற்ற கலை இலக்கியங்கள் எளிதில் மனனம் செய்வதற்கும் நினைவில் வைத்துக் கொள்வதற்கும் ஏற்றதாக, பயனுடையதாக விளங்கியது. எத்தகைய செய்திகளானாலும் அவற்றைக் கல்லிலோ, செப்புப் பட்டயங்களிலோ ஓலைச் சுவடிகளிலோ எழுதும் போது, செய்யுள் வடிவமே கையாளப்பட்டது. அவ்வாறு, செய்யுளுருவம் பெற்ற மருத்துவம், தனித்த இலக்கிய வகையாக வளர்ச்சியுற்று ஏட்டுருவம் பெறத் தொடங்கிற்று.



சித்தர் இலக்கியம்

தமிழில் வழங்கி வரும் மருத்துவ நூல் ஆசிரியர் பெயர்கள் அனைத்தும் சித்தர்கள் பெயராலேயே வழங்கப்படுகின்றன. அகத்தியர்12000; திருமூலர்8000; போகர்7000; மச்சமுனி800; சட்டமுனி3000; கொங்கணர்3000; கோரக்கர் சந்திரரேகை என்றே குறிப்பிடப்படுகின்றன. இப்பெயர்கள் அனைத்தும் சித்தர் பெயராகவே இருப்பதனால், மருத்துவ இலக்கியம் அனைத்தும் ‘சித்தர் இலக்கியம்’ என்னும் பொதுப்பெயரால் வழங்கப்படுகின்றன.

சித்தர் இலக்கியம் முழுவதும் மருத்துவம், வாதம், யோகம், ஞானம் என்னும் நான்கு கூறுகளைக் கொண்ட மருத்துவத்தின் அடிப்படைகளை வகுத்துக் கொண்டு, நோய்களைக் கண்டறிதல், மருந்துகளை நோய்களுக்கு ஏற்றவாறு தயாரித்து அளித்தல், நோய் அணுகாதிருக்க கற்ப முறைகளைக் கூறுதல், சாகா நிலையைப் பெற யோக முறைகளை விளக்குதல் போன்ற செய்திகளையும் முறைகளையும் உரைப்பதால், ‘மருத்துவ இலக்கியம்’ என்றும் வழங்கப்படும். அவ்வாறான மருத்துவ இலக்கிய நூல்கள் பழங்காலத்திலிருந்தே தமிழ்மொழியில் வழங்கி வருவதனால், அவை, ‘தமிழ் மருத்துவ நூல்’ என்று பழமையைச் சுட்டும் பெயராகவும் வழங்கப்படுகின்றன.


அகத்தியர்

தமிழில் காணப்பெறும் மருத்துவ நூல்களில் அகத்தியர் பெயரால் வழங்கும் நூல்களே அதிகமாக இருக்கின்றன.கீழ்த்திசைச்சுவடி நூலகத் தொகுப்பில் காணப்பெறும் மருத்துவச் சுவடிகளில் அகத்தியர் பெயரால் வழங்கப் பெறும் 166 சுவடிகள் உள்ளன. அத்தனை செய்யுள்களையும் ஒருவரால் இயற்றிட இயலுமா? என்று எண்ணும் போதே ஒரு வித மலைப்புத் தோன்றுகிறது. அந்நூல்களில் காணப் பெறுவது கற்பனைச் செய்யுள்கள் அல்ல; அறிவியல் கருத்துகளைக் கொண்ட மருத்துவச் செய்யுள்கள்.

அவ்வாறு கூறப்பெறுகின்ற நூல்கள் தொகுக்கப்பெற்ற பட்டியல்களில் காணப் பெறாதவை. அவ்வாறான நூல்களில் சிலவற்றின் விபரம் வருமாறு:

அகத்தியர்81000; அகத்தியர்51000; அகத்தியர்30000; அகத்தியர் 21000; அகத்தியர்18000; அகத்தியர்8000; திருமூலர்8000; பரஞ்சோதி 8000; கோரக்கர் வெண்பா; மச்சமுனி கலிப்பா; சங்கர மாமுனி கிரந்தம் போன்றவையாகும்.

இந்த சுவடிகள் எல்லாம் காலப்போக்கில் அழிந்து வருகிறதே . இதனை பாதுகாக்க அரசு முயற்சி எடுத்து வருகிறது .


மிகவும் நலிந்தும் சிதைந்தும் காணப்படும் சுவடிகளும், நல்ல நிலையிலும் சிதைவுகள் ஏதுமில்லாத நிலையில் உள்ள சுவடிகளும், தொடக்கமும் முடிவும் இல்லாமல் இடைப்பகுதி மட்டுமே உள்ள சுவடிகளும், முழுவதும் இருந்தாலும் படித்தறிய முடியாத நிலையில் உள்ள சுவடிகளுமாக இருக்கின்றன.

தமிழ் நாட்டில் உள்ள சுவடி நிலையங்களாவன:

1. தமிழ்ப் பல்கலைக்கழகம், ஓலைச்சுவடிகளைத் தொகுத்துப் பாதுகாப்பதுடன், அவற்றை ஆய்வு செய்வதற்கென்று ‘ஓலைச் சுவடித்துறை’ என்றொரு தனித்துறையையும் இயக்கி வருகிறது. அத்துறையில் சுமார் 5000 சுவடிகள் இருக்கின்றன. அவற்றுள் மருத்துவச் சுவடிகள் மட்டும் ஏறத்தாழ 60 சதவீதம் எனலாம்.

2. சென்னை, அரசினர் கீழ்த்திசைச்சுவடி நூலகம், பல்லாயிரக் கணக்கான சுவடிகளின் களமாக விளங்குகிறது. இந்நூலகம்

ஆய்வாளர், சுவடியியல் கற்போர், பதிப்பாளர், மருத்துவர், கல்வியாளர் போன்ற அனைவரும் பயன்படுத்தும் நோக்கில் அமைந்திருக்கிறது. இந்நிலையத்திலுள்ள தமிழ் மருத்துவச் சுவடிகளின் பட்டியல் பின்னிணைப்பில் இணைக்கப் பட்டுள்ளது.

3. தஞ்சைச் சரசுவதி மஹால் நூல் நிலையம், தஞ்சை மன்னர் சரபோஜி (கி.பி. 1798 -1832) அவர்களால் ஏற்படுத்தப்பட்டு, பல்வேறு துறை சார்ந்த சுவடிகள், கையெழுத்துப் பிரதிகள் எனத் தொகுக்கப்பெற்று பாதுகாக்கப் படுகின்றன. இந்நிலையத்தில் பல்வேறு தலைப்புகளைக் கொண்ட 396 மருத்துவச் சுவடிகள் உள்ளன.

4. உலகத் தமிழாராய்ச்சி நிறுவனம், 270 மருத்துவச் சுவடிகளைத் தொகுத்திருக்கிறது. அவற்றுள் சில பதிப்பிக்கப்பட்டும் வருகின்றன.

5. சித்த மருத்துவ மேம்பாட்டுக் குழு 478 தலைப்புகளைக் கொண்ட சுவடிகளைச் சேகரித்துள்ளது.

6. மத்திய அரசால் 1924–இல் நீதி அரசர் உஸ்மான் தலைமையில் அமைக்கப்பெற்ற சித்த மருத்துவ நூலாய்வுக்குழு, அதனது அறிக்கையில், 594 சுவடிகளைத் தொகுத்திருப்பதாக அறிவித் திருக்கிறது.

7. உ.வே.சாமிநாதையர் நூலகம், 15 மருத்துவச் சுவடிகளைப் பாதுகாக்கிறது.

8. விருத்தாசலம், குமார வீரசைவ மடத்தில் 15 மருத்துவச் சுவடிகள் இருக்கின்றன.

9. பாண்டிச்சேரி, பிரஞ்சுஇந்தியக் கலைக்கூடம் 80 சுவடிகளைப் பாதுகாக்கிறது.

10. மதுரை, தமிழ்ச்சங்கம் 24 தலைப்புகளைக் கொண்ட நூல்களைப் பாதுகாக்கிறது.

11. திருவனந்தபுரம், கீழ்த்திசைச் சுவடி நூலகம் 165 மருத்துவச் சுவடி களைக் கொண்டிருக்கிறது.

12. சென்னை, ஆசியவியல் நிறுவனம் பல சுவடிகளைத் தொகுக்கும் நிறுவனமாக விளங்குகிறது.

13. மேற்கண்ட நிலையங்களில் காணப்படும் சுவடிகள் மட்டுமல்லாது, பல தனியார் நிறுவனங்கள், மருத்துவச் சாலைகள், மருத்துவர்கள், சோதிடர்கள், மாந்திரீகர்கள், துறவிகள், மடாலயங்கள், சித்தர் பீடங்கள், கோயில்கள் எனப் பல்வேறிடங்களில் மேற்குறிப்பிட்ட தொகுப்புள் அடங்காத சுவடிகள் பயன் கருதாது முடங்கிக் கிடக்கின்றன.

த‌மிழில் தோன்றி மறைந்து விட்டதாகக் கருதப்படும் மிகச் சிறந்த நூல்கள் பல தமிழல்லாத பிற மொழிகளில் காணப்படுகின்றன. பிறமொழிகளில், மிகவும் குறிப்பாக சமஸ்கிருதம், திபெத்தியன், அரபிக், தெலுங்கு, மராத்தி போன்ற மொழிகளில் வழங்கிவரும் மருத்துவ நூல்கள், தமிழ் மருத்துவ நூல்களாகக் காணப்படுகின்றன என்பர். அம்மொழிகளில், தமிழ் மருத்துவ நூல்கள் எளிதில் கிடைக்கக் கூடியவையாகவும், திரண்ட மருத்துவக் கருத்துகளைத் தரக் கூடியவையாகவும் பல நூற்றாண்டுகளாகவே இருந்து வருகின்றன.

சித்த மருத்துவத்தை மரபு வழியாக அறிந்த தொழில்முறை மருத்துவர்கள், தங்களுக்கு வேண்டிய சித்த மருத்துவ முறைகளை அறிய அம்மொழிகளையே நாடி அறிந்து வருகின்றனர் .


எனவே நாம் நம்மால் ஆன சிறு முயற்சியாக தமிழ் நூல்களை பாதுகாக்க முயற்சி மேற்கொள்வோமா ...

Post Comment

சாதனை

நாம பிறந்து வளர்ந்து பள்ளி கல்லூரி பருவம் தாண்டி சம்பாதிக்க ஆரம்பித்து மனைவி மக்கள் என்று குடும்பமாகி கடைசியில் இவ்வுலகை விட்டு மறைகிறோம் .

இந்த இடைப்பட்ட காலத்தில் நமக்கென்று ஏதாவது லட்சியம் இருக்கும் . அதற்காக நாம் முயற்சி செய்கிறோம் .

நாம் ஏதாவது சாதனைகள் செய்து நம்மை உலகிற்கு அடையாள படுத்தவேண்டும் .

சாதிக்க துடிக்கும் இளைஞர்களுக்கு நான் எப்பவும் பக்கபலமாக இருப்பேன் _ வல்லரசுவில் கேப்டன் விஜயகாந்த் ‍‍_ பஞ்ச் .

சா த னை = சாதித்து காட்ட வேண்டிய லட்சியத்தை தனதாக்கிக் கொள்ளும் சிந்தனையின் செயல் வடிவம் சாதனை . இது என்னோட பஞ்ச் ....

அப்படி சாதனைகள் செய்த சிலரை பற்றி இந்த பதிவில் ....

எர்னஸ்ட் ரூதர்ஃபோர்டு (1871-1937)

---------------------------------------------

இருபதாம் நூற்றாண்டின் தலைசிறந்த பரிசோதனை இயற்பியல் விஞ்ஞானி எனப் பொதுவாகக் கருதப்படுபவர் எர்னஸ்ட் ரூதர்ஃபோர்டு ஆவார். கதிரியக்கம் பற்றி இன்று நாம் பெற்றிருக்கும் அணுவியல் இயற்பியல் பற்றிய ஆராய்ச்சியைத் தொடங்கி வைத்தவரும் அவரே.


ரூதர்ஃபோர்டு, நியூசிலாந்தில் பிறந்து வளர்ந்தார். அங்குள்ள கான்டர்பரிக் கல்லூரியில் பயின்று, தம் 23 ஆம் வயதுக்குள்ளேயே மூன்று பட்டங்களை (பி.ஏ., எம்.ஏ., பி.எஸ்சி.,) பெற்றார்.

யுரேனியத்திலிருந்து வெளியேறும் கதிரியக்க உமிழ் பொருள்களில் முற்றிலும் வேறுபட்ட இரு அமைப்பான்கள் அடங்கியுள்ளன என்பது ரூதர்ஃபோர்டின் முதல் கண்டுபிடிப்புகளில் ஒன்றாகும். இவற்றுக்கு "ஆல்ஃபா கதிர்கள்", "பீட்டா கதிர்கள்" என்று அவர் பெயரிட்டார். கதிரியக்கப் பொருள்களிலிருந்து வெளிவரும் அணு நுண்ம வரிசையே ஆல்ஃபாக் கதிர்கள் ஆகும். கதிரியக்கப் பொருள்களால் உமிழப்படும் விரை செலவுடைய எதிர்மின்மங்களின் வரிசை தான் பீட்டாக் கதிர்கள். இந்த அமைப்பான்கள் ஒவ்வொன்றின் இயல்பையும் அவர் பின்னர் செயல் விளக்கமாகக் காட்டினார். இவற்றில் விரைந்து இயங்கும் துகள்கள் அடங்கியுள்ளன என்று மெய்ப்பித்தார். அத்துடன், மூன்றாவது அமைப்பான் ஒன்றும் இருப்பதாக மெய்ப்பித்தார். அதனை "காமாகக் கதிர்கள்" என்று அழைத்தார். இவை, மிகக் குறுகிய ஒளிக் கதிரலையுள்ள ஊடுருவு கதிர்கள் ஆகும்.

கதிரியக்கத்தின் மிக முக்கியமான அம்சம் அதில் அடங்கியுள்ள எரியாற்றலே ஆகும். இந்த எரியாற்றல், ஒரு புற ஆதாரத்தைக் கொண்டிருப்பதாக பெக்கரல், கியூரிகள், பெரும்பாலான மற்ற விஞ்ஞானிகள் அனைவரும் கருதினார்கள். ஆனால், இந்த எரியாற்றல், யுரேனியத்தின் தனித்தனி அணுக்களின் உள்ளிருந்து வருகிறது என்று ரூதர்ஃபோர்டு மெய்ப்பித்துக் காட்டினார். இந்த எரியாற்றலின் அளவு, வேதியியல் வினைகளிலிருந்து வெளிப்படும் அளவை விட மிகமிக அதிகம் என்பதையும் அவர் மெய்ப்பித்தார். அவ்வாறு செய்ததன் மூலம், அணு ஆற்றல் என்ற முக்கியமான கோட்பாட்டை உருவாக்கினார்.

தனித்தனி அணுக்கள் அழிக்க முடியாதவை-மாற்ற முடியாதவை- என்று விஞ்ஞானிகள் எப்போதுமே கருதி வந்தார்கள். ஆனால், ரூதர்ஃபோர்டு, பிரெடெரிக் சோடி என்ற மிகத் திறமை வாய்ந்த இளம் உதவியாளரின் உறுதுணையுடன், ஓர் அணு ஆல்பாக் கதிர்களையோ, பீட்டாக் கதிர்களையோ உமிழும் போதெல்லாம், அந்த அணு முற்றிலும் மாறுபட்ட தன்மையுள்ள ஓர் அணுவாக உருமாற்றமடைகிறது என்பதை மெய்ப்பித்தார்.

இந்த அதிர்ச்சியூட்டும் கண்டுபிடிப்புகள், ரூதர்ஃபோர்டுக்கு 1908 இல் நோபல் பரிசு பெற்றுத் தந்தது.

என்ரிக்கோ ஃபெர்மி (1901 - 1954)

----------------------------------------

உலகின் முதலாவது அணு உலயை வடிவமைத்தவர் என்ரிக்கோ ஃபெர்மி ஆவார். இவர், இத்தாலியில் ரோம் நகரில் 1901 ஆம் ஆண்டில் பிறந்தார். இவர் அருந்திறன் வாய்ந்த மாணவராகத் திகழ்ந்தார். பிசா பல்கலைக் கழகத்தில் பயின்று தம் 21 ஆம் வயதிலேயே இயற்பியலில் பிஎச்.டி. பட்டம் பெற்றார்.

1933 ஆம் ஆண்டில் "பீட்டாச் சிதைவு" என்னும் ஒருவகை கதிரியக்கம் பற்றிய ஒரு கோட்பாட்டை ஃபெர்மி வகுத்தமைத்தார். இதில், மின் இயக்கமில்லாத சிற்றணுத் துகள்களாகிய "நியூட்ரான்கள்" பற்றியும் வலுவற்ற எதிரெதிர் செயல் விளைவுகள் குறித்தும், முதலாவது அளவீட்டு ஆய்வுரை அடங்கியிருந்தது. இவை இரண்டுமே இன்றைய இயற்பியலில் மிக முக்கியமான விவாதப் பொருள்களாகும்.

1934 ஆம் ஆண்டு முதற்கொண்டு, ஃபெர்மி அறியப்பட்டிருந்த வேதியியல் தனிமங்களை நியூட்ரான்களைக் கொண்டு தகர்த்துப் பார்க்கலானார். பல்வேறு வகையான அணுக்களால் நியூட்ரான்களை ஈர்த்துக் கொள்ள முடிகின்றது என்பதும், பல நேர்வுகளில், அத்தகைய 'அணுவியல் உருநிலை மாற்றம்' காரணமாக அணுக்கள் கதிரியக்கம் பெறுகின்றன என்பதையும் இவரது பரிசோதனைகள் காட்டின.

நியூட்ரான்களின் ஈர்ப்பு பற்றிய ஃபெர்மியின் முக்கியமான ஆராய்ச்சிக்காக 1938 ஆம் ஆண்டில் இவருக்கு இயறபியலுக்கான நோபல் பரிசு வழங்கப் பெற்றது.

ஃபெர்மியின் கண்காணிப்பின் கீழ் சிகாகோவில் வடிவமைக்கப்பட்டு, நிறுவப் பெற்ற முதலாவத அணு உலை, 1942 ஆம் ஆண்டு டிசம்பர் 2 ஆம் நாளன்று வெற்றிகரமாகச் செயற்படத் தொடங்கியது.

சூயி-வென்-தை (541 - 604)

--------------------------------


பல நூற்றாண்டுகளாகப் பிளவுபட்டுச் சிதறுண்டு கிடந்த சீனாவை ஒருங்கிணைத்து ஒன்றுபடுத்திய சீனப் பேரரசர் சூயி-வென்-தை ஆவார். இவருடைய இயற்பெயர் யாங்-ஷியன் என்பதாகும்.

வடக்குச் சீனாவில் பெருஞ்செல்வாக்கு வாய்ந்த ஓர் உயர்குடியில் 541 ஆம் ஆண்டில் யாங்-ஷியன் பிறந்தார். இவரது 14 ஆம் வயதிலேயே இவருக்கு முதலாவது இராணுவப் பதவி கிடைத்தது.
யாங்-ஷியன் மிகவும் திறமைசாலியாக விளங்கியதால், வடக்குச் சீனாவை ஆண்ட சூ அரச மரபைச் சார்ந்த பேரரசின் ஆட்சியில், மிக விரைவாக முன்னேறி வந்தார்.

581 ஆம் ஆண்டில், இவரது 50 ஆம் வயதில், இவர் புதிய பேரரசராக ஏற்றுக் கொள்ளப்பட்டார்.
இப்படையெடுப்பு வெகு துரிதமாக வெற்றி தேடித் தந்தது. 589 ஆம் ஆண்டில் இவர் சீனா முழுவதற்கும் பேரரசரானார்.


முதலாம் ஜஸ்டீனியன் (483 - 565)

------------------------------------------

பேரரசர் ஜஸ்டீனியன் ரோமானியச் சட்டத்தைத் தொகுத்ததற்காகப் புகழ் பெற்றவர்.

ஜஸ்டீனியன் 483 இல் இன்றைய யூகோஸ்லாவியாவிலுள்ள டாரசீயம் எனுமிடத்தில் பிறந்தார். அவர் ஜஸ்டின் திரேஸ் நாட்டைச் சேர்ந்த எழுத்தறிவற்ற உழவர் ; படையில் சேர்ந்து படிப்படியாக உயர்ந்து இறுதியில் கிழக்கு ரோமானியப் பேரரசின் மன்னரானார்.


ஜஸ்டீனியன் பிறப்பதற்கு 7 ஆண்டுகளுக்கு முன் 476 ஆம் ஆண்டில் ஜெர்மானியமிலேச்சர் குலங்களின் தாக்குதலால் மேற்கு ரோமானியப் பேரரசு குலைந்து சரிந்தது. கான்ஸ்டான்டி நோப்பிளைத் தலைநகராகக் கொண்ட கிழக்கு ரோமானியப் பேரரசே நிலைத்து நின்றது. இழந்த மேற்குப் பகுதிகளைத் திரும்பக் கைப்பற்றி ரோமானியப் பேரரசை மீட்க வேண்டுமென்று ஜஸ்டீனியன் உறுதி பூண்டார் .



ஜஸ்டீனியனுக்கு அவருடைய திறமைமிக்க துணைவியார் தியடோரா பெரிதும் உதவியாக இருந்தார்.

548 ஆம் ஆண்டில் தியடோரா புற்று நோயினால் இறந்தது ஜஸ்டீனியனுக்கு ஒரு பேரிழப்பாக இருந்தது .


இறுதியில் ஜஸ்டீனியனின் சட்டத் தொகுப்பு ஐரோப்பா கண்டத்தின் சட்ட முறைகளின் முக்கிய அடிப்படையானது.
ஜஸ்டீனியனின் சட்டத் தொகுப்பு ஐரோப்பாவின் பெரும் பகுதியில் அதன் பகுதிகள் சட்டத்துடன் இணைக்கப் பெற்றன. மேலும் அது சட்டப் படிப்பு பயிற்சி, ஆராய்ச்சி ஆகியவற்றின் அடிப்படையுமானது. நாளடைவில் ஐரோப்பிய அரசுகளல்லாத பல அரசுகளும் உரிமையியல் சட்டங்களை ஏற்றதால், ஜஸ்டீனியனின் சட்டம் பரவலான விளைவுகளை ஏற்படுத்தியது.



எட்வர்டு ஜன்னர் (1749-1823)

-----------------------------------



பேரச்சம் விளைவித்த அம்மை நோய்க்கு எதிரான ஒரு தடுப்பு நடவடிக்கையாக அம்மை குத்தும் முறையைக் கண்டுபிடித்து உலகெங்கும் பரப்பிய ஆங்கிலேய மருத்துவ அறிஞர் எட்வர்டு ஜென்னர் ஆவார்.

அம்மை நோய் ஒரு பயங்கரத் தொற்று நோயாக இருந்தது. ஐரோப்பாவில் வாழ்ந்த மக்களில் பெரும்பான்மையினர், தங்கள் வாழ்வில் எப்போதாவது ஒரு முறை, இந்தத் தொற்று நோயால் பீடிக்கப்பட்டனர். இந்நோய் கண்டவர்களில் 10% - 20% பேர் மாண்டு போயினர். உயிர் பிழைத்தவர்களில், மேலும் 10% அல்லது 15% பேர் அம்மைத் தழும்புகளால் நிரந்தரமாக விகாரமடைந்தனர். அம்மை நோய்க் கொடுமை ஐரோப்பாவோடு நின்று விடவில்லை. வட அமெரிக்கா முழுவதிலும் இந்தியா, சீனா ஆகிய நாடுகளிலும், உலகின் வேறு பல பகுதிகளிலும் அம்மை நோய் கோரத் தாண்டவமாடியது. எல்லா இடங்களிலும், குழந்தைகளே இந்நோய்க்குப் பெரும்பாலும் பலியானார்.

ஜென்னர் 1749 ஆம் ஆண்டில் இங்கிலாந்தில் கிளவுசெஸ்டர்ஷயரிலுள்ள பெர்க்கிலி என்னும் சிறிய நகரில் பிறந்தார். பன்னிரண்டு வயதுச் சிறுவனாக இருக்கும் போதே இவர் ஓர் அறுவை மருத்துவரிடம் தொழில் பயில்பவராகச் சேர்ந்தார். பின்னர், இவர் உடல் உட்கூறியல் பயின்றவாறே, ஓர் மருத்துவ மனையிலும் பணியாற்றி வந்தார். 1792 ஆம் ஆண்டில், புனித ஆண்ட்ரூஸ் பல்கலைக் கழகத்தில் இவர் மருத்துவப் பட்டம் பெற்றார். பின்னர் தமது 40 ஆம் வயதுகளில் இவர் கிளவுசெஸ்டர்ஷயர் நகரில் ஒரு சிறந்த மருத்துவராகவும், அறுவை மருத்துவராகவும் புகழ் பெற்றார்.

1796 ஆம் ஆண்டு மே மாதத்தில், ஜேம்ஸ்ஃபிலிப்ஸ் என்ற எட்டு வயதுச் சிறுவனுக்கு, ஒரு பால் பண்ணைப் பெண்ணின் கையிலிருந்த கோ வைசூரியின் கொப்புளத்திலிருந்து எடுத்த பாலை ஊசி மூலம் ஜென்னர் ஏற்றினார். எதிர்பார்த்தது போலவே, அச்சிறுவனுக்கு கோ வைசூரி கண்டது. ஆனால், அவன் விரைவிலேயே குணமடைந்தான். பல வாரங்களுக்குப் பிறகு, அம்மைப் பாலை பிலிப்சுக்கு ஜென்னர் ஊசி வழியாகச் செலுத்தினார். இவர் நம்பியதுபோலவே, அச் சிறுவனுக்கு அம்மை நோயின் அறிகுறிகள் உண்டாகவே இல்லை.

ஜென்னர் தாம் கண்டுபிடித்த இந்த முறையை இலவசமாக உலகுக்கு வழங்கினார். இதிலிருந்து ஆதாயம் பெற இவர் விரும்பவில்லை. எனினும், 1802 ஆம் ஆண்டில், பிரிட்டிஷ் நாடாளுமன்றம் இவரது அருந் தொண்டுக்கு நன்றி தெரிவித்து இவருக்கு 10,000 பவுன் பரிசு வழங்கியது. சில ஆண்டுகளுக்குப் பிறகு, நாடாளுமன்றம் இவருக்கு மேலும் 20,000 பவுன் அளித்தது. இவர் உலகப் புகழ் பெற்றார்.

இவர் 1823 ஆம் ஆண்டின் தொடக்கத்தில் தமது 73 ஆம் வயதில், தம் சொந்த ஊராகிய பெர்க்கிலியில் காலமானார்.

தொடரும் .....

Post Comment

சிந்து சமவெளி

சிந்து சமவெளி நாகரீகத்தைப் பத்தி கொஞ்சம் தெரிந்து கொள்வோமா...

(மொகஞ்சதாராவில் அகழ்ந்து எடுக்கப்பட்ட பண்டைய கால கட்டடப்பகுதி)

மொகெஞ்சதாரோ (Mohenjo-daro, மொஹெஞ்சதாரோ) என்பது சிந்துவெளிப் பண்பாட்டுப் பகுதியில் அமைந்திருந்த முக்கிய நகரங்களுள் ஒன்று. ஏறத்தாழ கிமு 26 ஆம் நூற்றாண்டளவில் உருவாகியிருக்கக்கூடும் எனக் கருதப்படுகின்ற இது இன்றைய பாகிஸ்தானின் சிந்துப் பகுதியில் உள்ள சுக்கூர் என்ற ஊருக்கு தென்மேற்கே 80 கிலோமீட்டர் தொலைவில் உள்ளது.
சிந்துவெளியில் அமைந்திருந்த நகரங்களில் மிகவும் பெரியது எனப்படும் இந் நகரம், அக்காலத்தில் தெற்காசியாவின் முக்கியமான நகரமாகவும் விளங்கியது.

இது சிந்துவெளியின் இன்னொரு முக்கிய நகரமான ஹரப்பாவை விட நன்கு பாதுகாக்கப்பட்டுள்ளது. இது ஹரப்பாவில் இருந்து 400 மைல் தொலைவில் உள்ள இந் நகரம் கி.மு. 1700-இல் சிந்துநதியின் தடம் மாறியதால் அழிந்திருக்கலாம் எனச் சிலர் நம்புகிறார்கள்.

(கராச்சி , தேசிய தொல்பொருட்காட்சி நிலையத்தில் கி.மு.2500 ஆண்டு பழமையான சிலை)

மொஹெஞ்சதாரோவின் அழிபாடுகள் தொல்பொருள் ஆராய்ச்சியாளர்களால் முதன் முதலில் 1920களில் கண்டறியப்பட்டது. எனினும் ஆழமான ஆய்வு முயற்சிகள் 1960 ஆம் ஆண்டுகளுக்குப் பின்னரே நடைபெற்று வருகின்றன.
மொகெஞ்சதாரோவில் அகழ்ந்து எடுக்கப்பட்ட கட்டிடப்பகுதிஇது யுனெஸ்கோவின் உலகப் பண்பாட்டுச் சின்னங்களில் ஒன்றாக அறிவிக்கப்பட்டுள்ளது.

இப்பகுதியில் இடம்பெற்று வருகின்ற அண்மைக் காலத்திய விரிவான நடவடிக்கைகள், பாகிஸ்தானின் தொல்லியல் மற்றும் அருங்காட்சியகத் திணைக்களத்தினதும், பிற ஆலோசகர்களினதும் உதவியுடன் யுனெஸ்கோ மேற்கொண்டுவரும் காப்பாண்மை (conservation) நடவடிக்கைகளை மையப்படுத்தியுள்ளது.

இப்பகுதியில் ஏறத்தாழ 500 ஏக்கர் பரப்பளவில் மேற்கொள்ளப்பட்டிருந்த காப்பு வேலைகள், நிதிப் பற்றாக்குறையினால், 1997 ஆம் ஆண்டில் நிறுத்தப்பட்டது. எனினும் ஏப்ரல் 1997 ஆம் ஆண்டில், யுனெஸ்கோவின் ஆதரவில், மொஹெஞ்சதாரோ அழிபாடுகளை வெள்ளத்திலிருந்து பாதுகாப்பதற்கான திட்டம் ஒன்று தொடங்கப்பட்டது. இரண்டு பத்தாண்டுகளில் நிறைவேற்றப்பட இருக்கும் இந்தத் திட்டத்திற்காக யுனெஸ்கோ நிறுவனம் பத்து மில்லியன் அமெரிக்க டாலர்களை ஒதுக்கியுள்ளது.

வரலாறு

மொஹெஞ்சதாரோ கி.மு 2600 அளவில் உருவாகி கி.மு. 1700 அளவில் அழிந்துபோனதாகச் சொல்லப்படுகின்றது. சர் ஜோன் மார்ஷல் என்பவர் தலைமையிலான தொல்லியலாளர்கள் இதனை 1920 இல் கண்டுபிடித்தனர். இவர் நினைவாக இவர் பயன்படுத்திய மோட்டார் வண்டி இன்றும் மொஹெஞ்சதாரோ அருங்காட்சியகத்தில் வைக்கப்பட்டுள்ளது. 1945 ஆம் ஆண்டில், அஹ்மத் ஹசன் தானி (Ahmad Hasan Dani) என்பவரும் மோர்ட்டிமர் வீலர் (Mortimer Wheeler) என்பவரும் மேலும் அகழ்வாவுகளை இப்பகுதியில் நடத்தினர்.

ஹரப்பா

அரப்பா (Harappa, ஹரப்பா) என்பது, சிந்து வெளி பகுதியில் அமைந்திருந்த பண்டைய நகரங்களில் ஒன்று. இன்றைய பாகிஸ்தானின் வடகிழக்குப் பகுதியில் பஞ்சாப் மாகாணத்தில், சகிவாலுக்கு 35 கிலோமீட்டர் தொலைவில் இதன் அழிபாடுகள் உள்ளன. புதிய நகரம், ரவி ஆற்றின் பழைய பாதைக்கு அண்மையில் அமைந்துள்ளது. அரண் செய்யப்பட்டிருந்த பண்டைய நகர அழிபாடுகளும் இதன் அருகிலேயே காணப்படுகின்றன.

கிமு 3300 இலிருந்து கிமு 1600 வரை இருந்திருக்கலாம் எனக் கருதப்படும் இந் நகரம் 40,000 வரையான மக்கள்தொகையைக் கொண்டதாக இருந்திருக்கலாம் எனவும் கணிக்கப்படுகின்றது. இது அக்கால அளவுகளின் படி அதிகமானதாகும். ஹரப்பாப் பண்பாடு இன்றைய பாகிஸ்தானின் எல்லைகளுக்கும் அப்பால் பரந்திருந்தபோதும், இதன் மையப்பகுதிகள் சிந்து மற்றும் பஞ்சாப் பகுதிகளிலேயே இருந்தன.

மெஹெர்கர்

மெஹெர்கர், இன்றைய பாகிஸ்தானிலுள்ள, பண்டைக்காலக் குடியேற்றப் பகுதி ஆகும். இப் பிரதேசத்தின் புதிய கற்காலக் குடியேற்றங்கள் பற்றிய தொல்லியல் ஆய்வுகளுக்கு மிக முக்கியமான களங்களில் இதுவும் ஒன்று. இக்குடியேற்றத்தின் எச்சங்கள் பாகிஸ்தானின் பலூச்சிஸ்தான் பகுதியில் காணப்படுகின்றன.

இது போலான் கணவாய்க்கு அருகிலுள்ள கச்சிச் சமவெளிப் பகுதியில், சிந்துநதிப் பள்ளத்தாக்குக்கு மேற்கே, குவேட்டா (Quetta), காலத் (Kalat), சிபி (Sibi) ஆகிய நகரங்களுக்கு இடையே அமைந்துள்ளது.

பிரான்சைச் சேர்ந்த தொல்லியலாளர்களால் கண்டுபிடிக்கப்பட்ட இக் களம், உலகின் பழமையான மனித குடியேற்றங்களில் ஒன்றாகக் கருதப்படுகின்றது. இதன் ஆதிக் குடியேற்ற வாசிகள், பலூச்சிக் குகைவாழ்நரும், மீனவர்களும் ஆவர். 1974 இல் நடத்தப்பட்ட தொல்லியல் ஆய்வுகளை (ஜர்ரிகேயும் (Jarrige) மற்றவர்களும்) அடிப்படையாகக் கொண்டு, இப்பகுதியே தென்னாசியாவின் அறியப்பட்ட வேளாண்மைக் குடியேற்றங்களில் முற்பட்டதாகக் கருதப்படுகின்றது. இங்குள்ள குடியேற்றத்துக்கான மிக முற்பட்ட தடயங்கள் கி.மு. 7000 ஐச் சேர்ந்தவை. தென்னாசியாவின் முற்பட்ட மட்பாண்டச் சான்றுகளும் இங்கேயே கிடைத்துள்ளன.

மெஹெர்கரின் செப்புக்கால மக்கள், வடக்கு ஆப்கானிஸ்தான், வடகிழக்கு ஈரான் மற்றும் மத்திய ஆசியப் பகுதிகளுடனும் தொடர்புகளைப் பேணி வந்துள்ளதாகத் தெரிகிறது.

லோத்தல்

(இந்திய தொல்லியல் ஆய்வத்தின் கருத்துப்படி லோத்தலின் பண்டைய காலத்தின் தோற்றம்)

லோத்தல் சிந்துவெளி நாகரிகக் கால நகரங்களில் ஒன்றாகும். இதன் அழிபாடுகள் தற்கால இந்தியாவின் குஜராத் மாநிலத்தில் உள்ளது. இதன் தோற்றத்தின் காலம் கி.மு 2400 எனக் கணிக்கப்பட்டுள்ளது. இக் காலத்தைச் சேர்ந்த, இந்தியாவிலுள்ள முக்கியமான தொல்லியல் களமாக இது கருதப்படுகின்றது. 1954 ஆம் ஆண்டில் கண்டுபிடிக்கப்பட்ட இவ்விடத்தில், 1955 ஆம் ஆண்டு பெப்ரவரி 13 ஆம் நாள் தொடக்கம் 1960 ஆம் ஆண்டு மே 19 வரை அகழ்வாய்வுகள், இந்தியத் தொல்லியல் ஆய்வகத்தினால் நடத்தப்பட்டது.

Post Comment