ஒளியும் ஒலியும்

முதல்முறை என் விழிகள்
தேடியது உன் வரவை நோக்கி!
அவள் வருவாளா என மனம்
பட்டாம்பூச்சிகளாய் சிறகடிக்க‌
தூரத்தில் இருள் விலக‌
அமைதி அலறி அடித்து ஓட!

அங்கே ஒரு ஒளியும் ஒலியும்
அரங்கேறியது.

எல்லோரும் காண ஒரு அழகு
தேவதையாய் மின்னினாய் என் அருகாமையில்!

உன் முதல் பரிசம் ஆயிரமாயிரம்
ஆனந்த ஊற்றுகள் பொங்கிட‌
நான் மெய்மறக்கையில்
ஆச்சர்யமானேன் எல்லோருக்கும்!
உன் அருகாமை என்னை இம்சிக்க‌

என்னைப்போலவே உன் வருகையை
ஆயிரமாயிரம் கண்கள் ஏங்குகின்றன!

மழையே! உன் வரவை எண்ணி!!

Post Comment

நான் கண்டதில் இப்படியும் சிலர்

அவன் இவனை குற்றம் சொல்வதும்
இவன் அவனை குற்றம் சொல்வதும்
இழிவாய் தெரியவில்லை உங்களுக்கு..

எத்தனையோ இயக்கங்களாய் பிரிந்து
ஒருத்தனை ஒருத்தன் குறைசொல்லும் நேரத்தில்
அத்தனையும் ஒன்று கூடினால்,
பிரச்சனை எதுவுமில்லையே..

உண்ண உணவின்றி உடுக்க உடையின்றி
எத்தனையோ பேர் உள்ளனர்
நாட்டிலும் உன் வீட்டிலும்.,
அவர்களை பற்றிய சிந்தனை
இல்லை உனக்கு., வீண்விவாதங்களோடு
அடித்துக்கொள்வதற்கு மட்டும்
இத்தனை நேரம் எதற்கு?!

காலநேரத்துடன் சேர்ந்து
கரையுதடா உன் வாலிபமும்
ஆனால் ஒற்றுமையை மட்டும்
கடைபிடிக்கவில்லை எப்பொழுதும்

அல்லாஹ், ரசூல் காட்டித்தராத
விஷயங்களில் தர்க்கம் செய்தே
தரம் கெட்டு போனாயடா
என்னருமை சகோதரா..

ஒரே ஒரு நிமிசம்
புரட்டியாவது பாராடா
அருள்மறையாம் திருமறையை
பிறகு மாற்றிக்கொள்வாயடா
உன் எதிர்மறையை

காசை கொடுத்து வாழும் நெறியை
நாசுக்காக கற்பிக்கும் இறைவனை
தூசாக எண்ணி துச்சமென நினைத்து
சொகுசு வாழ்க்கைக்கு விலை போனாயடா..,

ஆனால் ஒன்றே ஒன்று நிச்சயம்.,

இதெல்லாம் ஒருகணமேனும்
திரும்பிப்பார்க்கும் வேளை - இறைவன்
திரும்ப அழைத்துக்கொள்வான்
திரும்பமுடியாத இடத்துக்கு...

Post Comment

பயணம் தொலைவுதான்

என் பஞ்சம்தீர்க்க
அசைந்து அசைந்து வரும்
மழை தரும் மேகமே
கொஞ்சம் நில்..!
என் கதையை கேட்டபின் செல்..!

ஏற்றம் இறைத்து நீர்பாய்ச்சி
உழுதுஉழுது பல நெற்கோட்டைகளை
உருவாக்கிய கைகளும் பிசைகிறது
பழையகஞ்சியையும் மிளகாயையும்..
கலங்கிய‌ கண்களில் நீருடன்..!

பசியால் வந்தோரை
பசியாற வைத்தும்
இன்று,
தன் பசி நீக்க
ஒவ்வொரு கணமும்
உருளுகிறது வயிற்றினிலே?..

பர்லாங் தூரம் எம்பெண்கள்
கடப்பது ஒரு குடம் நீருக்காக..!
மடியில் கனமில்லை
தலைபாரம் தான் தீரவில்லை..!

செம்மண் மேடாக காட்சியளிக்கும்
குளமும் வாய்க்காலும்
தூரமானது கால்நடைகளுக்கு
அம்மா என்று பாசமுடன்
அழைக்கும் அவைகளுக்கு
தண்ணீர் காட்டவே நீரில்லையே..!
அய்யோ என் செய்வேன்....?!

'நெல்லுக்கு இறைத்த நீர்  -வாய்க்கால்
வழியோடி புல்லுக்கும் ஆங்கே புசியுமாம்'

ஆறு நிறைந்து,
வாய்க்கால் நிறைந்து,
பூத்துக் குலுங்கிய சோலைகளும்
கண்ணுக்கெட்டிய தூரம்வரை
பாய்விரித்து படுத்திருந்த,

எங்கள் வயல்வெளிகளும்
வற்றாத ஜீவநதி பாய்ந்து
வளம் கொடுத்த
புண்ணிய பூமி எங்கே.?
எங்களின் தாகம் தீர்த்த
பரணி எங்கும் மணல்மேடாய்..?!

பார்த்து பார்த்து
சலித்துப் போன‌
வானமும் பொய்த்தது
மழை மேகமும்
கேட்டது சில்வர் அயோடைடை?!..

குழாயினில் வரும் காற்றில்
எங்களின் மூச்சிக்காற்றும்
கலந்தது நிலத்தடி நீருக்காக..

யாரை குற்றம் சொல்ல..?!

மரம் வளர்ப்போம் மழை பெறுவோம்
என்ற வாசகத்தை தொலைத்து
நிற்கும் எங்கள் அறிவின்மையை
சொல்லவா..!

காட்டையும் வயற்காட்டையும்
அழித்து ப்ளாட் போட்ட
கயவர்களை பற்றி சொல்லவா..?!


அள்ள அள்ள குறையாது
தரும் அமுதசுரபி போல
வற்றாத ஜீவநதி பரணியில்
மணலை அள்ளி அள்ளி
பாலையாக்கிய கருணை
பிரபுக்களை பற்றி சொல்லவா..?!

குப்பைகளையும் ஆலைக்கழிவுகளையும்
ஆற்றில் கலக்க வைத்து
தொற்றுநோய்களை பரப்பிய
புண்ணியவான்களை பற்றி சொல்லவா..?!

செல்லும் தூரம் அறியாமலே
செல்லும் காலக்கொடுமையை
பற்றி சொல்லவா..?!

அதோ அங்கே தெரியும்
நிழல்கூட கருவேல நிழல் தான்
இளைப்பாற சிறிது நிழல் கிடைக்குமா..?!
எங்கள் தாகம் தீருமா..?!

சொல்லுங்க மேகங்களே..!

இதோ இந்த பயணம்
எப்போதும் தொலைவுதான்..!!


***********

குறிப்பு:

நெல்லை, தூத்துக்குடி, விருதுநகர் போன்ற தென்மாவட்டங்களில் தற்போது நிலவி வரும் தண்ணீர் பற்றாக்குறையை மையமாக வைத்து எழுதப்பட்ட கவிதை இது.

ரியாத் தமிழ்சங்கம் - கல்யாண் நினைவு அமைப்பினர் நடத்திய உலகாளவிய கவிதைப்போட்டிக்கு அனுப்பப்பட்ட கவிதை.

படம் உதவி : நன்றி தட்ஸ்தமிழ்.

Post Comment

உன்னோடு ஒரு பயணம்..!

உன்னோடு ஒரு பயணம்..!

ஒவ்வொருமுறையும் ஏதோ ஒன்று

இழுத்து செல்கிறது உன் அருகாமையை தேடி..!

பயணத்தில் தேடித்தேடி

அலுத்துப்போகின்றேன்

மறுபடியும் மறுபடியும் இம்சிக்கிறாய்..!

விழிகளுக்குள் காட்சிகள் விரிய

உன்னோடு பயணித்தது ஒளியும் ஒலியுமாய்..!

மீண்டும் சந்திக்கும் தருணத்தை

விழா எடுக்க முயற்சிக்கிறேன்

என் நினைவுகளும்

விரைந்தோடும் காலமும்

உனக்காக வீற்றிருக்கும் அன்பே..!

என் கைக்கோர்த்தபடி நீ

சுற்றிவரும்போது வியந்து வியந்து

ஒவ்வொன்றையும் நீ கேட்கும்போது

நான் விளக்கும் அழகினை

மெய்மறந்து ரசித்தது

இன்னும் மறையவில்லையடி அன்பே..!

உன் செல்ல பொய்க்கோபங்களை

காணாது அங்குமிங்கும் தேடுகின்றேன்

விண்ணில் தெரியும் நட்சத்திரங்கள்

மினுமினுக்கின்றன

உன் அழகிய முகமும்

மின்னுகின்றதா என

மெய்மறந்து நிற்கின்றேன்

கடும்குளிரையும் பொருட்படுத்தாது..!

Post Comment

பெண்ணே..! நீயும்

 பெண்ணே..! நீயும்

மெல்லிய தோகை சிலிர்த்தெழும் தேகம்
அள்ளிய நளினம் மெல்லிடை ஸ்பரிசம்
கொஞ்சிப்பேசும் விழிகளின் இயக்கம்
எஞ்சிய எவரும் காணாத நாணம்

வந்தென்னை அணைத்துக்கொள்ளடா என
ஏங்கும் உந்தன் பருவம் ஒரு தோகையோ!
கார்க்கூந்தல் வாசத்தால் எனை மயக்கும் மங்கையே

பெண்ணே..! நீயும் ஒரு அழகு மயில் தானடி!!..

Post Comment

கரையில்லா ஜோதி?..

கவியே என் ஆருயிர் கவியோ நீ
உன் கவிக்கண் காண ஏக்கங்கள் எம்மில்..

வரிகளை கொண்டு உன்னையடையும்
வழிகளாய் உருவகப்படுத்தினோம்..
அது ஏக்கம், சோகம், இன்பம்,
தாங்கி நிற்கும் உணர்வுகளாக..

என்று எழுத்து என்னும் மூதாட்டியை
நிலாவில் கண்டோமோ அன்றே
நீயும் பிறந்திருப்பாய் என்றே
தோன்ற வைத்திருப்பாய்!!

சிக்கிமுக்கி காலம்முதல்
தீப்பொறிகள் போல
காதலுக்காக தூதுச்சென்றாயோ!!
அல்லது விதைகளை தூவிச்சென்றாயோ?..
உன் சக்தியால் சில மக்கியும்
பல விருட்சமாகவும் யெங்கெங்கிலும்...

ஆண்டியிலிருந்து கவிச்சக்கரவர்த்தியையும்
தாண்டி கவியரசாகவும் கவிபேரரசுகளாய்
பரந்துவிரிந்த தேசமிது
உன்னை விரும்பாதோர் அவனியில் உண்டோ?..

கவியே என் ஆருயிர் கவியோ நீ..
பூவையர் மனம் போல மென்மையானவளே!
ஒவ்வொரு நாளும் புத்தம்புது
மலராய் பூக்கின்றாய் என்னுள்..
எனை வந்து சேருவது என்னாளோ?..

வா அருகினில் வா
வந்தெனை அணைத்துக் கொள்
எமை உன் ஜோதியில் கலக்க வா..

உன் கவிக்கண் காண ஏக்கங்கள் எம்மில்...

,

Post Comment

பொங்கல் நல்வாழ்த்துகள்

பொங்கலோ பொங்கல்

புத்தரிசியும் புதுப்பானையும்
போட்டியிட்டு பொங்கலிட‌
சந்தோசமும் பூரிப்பும் பெருமிதமிட‌
இவ்வாண்டும் மகசூல் அதிகமாகிட‌
எங்கள் வாழ்வும் வளமும் பெருகிட‌
மங்களமாய் வசந்தம் வீச
குலவையிடுவோம்

பொங்கலோ பொங்கல் என்று!!

உழக்கரிசி நெல்லுமணி
பல கோட்டைகளாக
உருவெடுத்திட‌
உண்ணாமல் உறங்காமல்
கண்ணிமை போல‌
களத்துமேட்டினில் காத்த
உரமிட்டு உரமிட்டு
உரமேறிய கரங்களும்
சொல்லுதே

பொங்கலோ பொங்கல் என்று!

தன் பசி துறந்து பிறர்
பசி நீக்கும் மருத்துவனாய்
உழைப்பின் பெருமையை
உலகறிய செய்த‌
விவசாயியே! என்றும் நீ வாழியவே!

என்றும் உங்கள் வாழ்வினில்
வசந்த ஒளிவீசிட‌
வாழ்த்துதே எங்கள் மனம்

என் மனமார்ந்த பொங்கல் திருநாள் நல்வாழ்த்துகள்.

*****

இனிய பொங்கல் திருநாளில் எல்லா வளமும் பெற்று இந்த தமிழ் புத்தாண்டு இனிய புத்தாண்டாக மலர இறைவனிடம் பிரார்த்திப்போம் .

அனைவருக்கும் என் இனிய பொங்கல் திருநாள் நல்வாழ்த்துகள்.

Post Comment

கடவுள் எனும் முதலாளி..

என் பஞ்சம்தீர்க்க‌
அசைந்து அசைந்து வரும்
மழை தரும் மேகமே
கொஞ்சம் நில்லு
என் கதையை கேட்டபின் செல்!

கலங்கிய கண்களில் நீர்
என் கஷ்டங்களை நினைத்துப்
பார்க்கும்போதும் நீர்தானா
என் உழைப்பிலும் தெரிகிறது
உந்தன் சொகுசு வாழ்க்கை!

ஏற்றம் இறைத்து நீர்பாய்ச்சி
உழுதுஉழுது பல நெற்கோட்டைகளை
உருவாக்கிய கைகளும் பிசைகிறது
பழையகஞ்சியையும் மிளகாயையும்..
அப்போதும் கலங்கிய‌ கண்களில் நீர்!!


வயக்காட்டில் விளைந்ததை
சந்தையில் விற்ற பணத்தை
எண்ணிப்பார்க்கும் உன் கைகளை
நோக்கியபோதும் கண்களிலும் நீர்..
நேற்றையவிட அதிகம் தரமாட்டாயா என்று!

"அப்பா, நா பள்ளிக்கொடம் போறேன்ப்பா",
என்ற மகனின் ஆசையை
நிராசையாகாமல் இருக்க
விலையாய் எந்தன் வயக்காடு
பத்திரமாய் உன் டிரங்குபொட்டியில்!!

பத்திரத்தை பத்திரமாய் மீட்டெடுக்க‌
உழைக்கிறேன் உழைக்கிறேன்
உழைத்துக்கொண்டே இருக்கிறேன்...

ஆளான மகனின் அந்தஸ்துகண்டு
அவனோடு கைக்கோர்க்க விழையும்
உன்னைக்கண்டு பெருமிதமாய்
கலங்கிய கண்களில் நீர்!

Post Comment

தொடரும் ஆரம்பமும்...

தொடர்கதையாய் தொடர்ந்திடும்
வாழ்வினில் விடுகதையாய்
இந்த (இந்திய) பயணம்
சில மாறா நினைவலைகளோடு
உலா வருதே...!

உற்று நோக்கி நலம்பல விசாரித்து
விருந்தோம்பலுடன் உண்டுறங்கி
கருத்துக்களை பகிர்ந்து
மகிழ்ச்சியை வெளியாக்கிய தருணங்களை
மறந்தும் இருக்கமுடியுமா?..

அருகில் இருக்கும்போது
சொல்லத் தோன்றாதது
தூரத்தில் தெரியும்
ஒளியைப்போல பிரகாசமாய்
கவியுடன்கூடிய உணர்வுகள்
பொங்கி பீறிடுகின்றன!

உன் அருகாமையை எண்ணியெண்ணி
ஏக்கங்கள் வாட்டும்போது
நீ காட்டிய அன்பும் அரவணைப்புகளால்
மனம் லேசாகுகிறதே..!
இப்போது நீ அருகில் இருப்பது
மாயையைத்தான் என்றாலும்
மனம் அதை விரும்புதே!

விடை சொல்லத் தெரியாத‌
கேள்விகள் ஆயிரம் உண்டு
விடைகள் மட்டும் காணாமல்
போய்விட்டது..!
தேடல்கள் தொடரட்டும்...!

,

Post Comment

கானல் நிலா..!

கானல் நிலா..!

பனிவிழும் இரவுதனில்
நீயும் அருகினில் என்னவளும்
கையிலேந்தி உன்னை ரசிக்கும்போது
அவள் மெல்லமெல்ல நாணுகிறாள்.
உன்னழகை ரசிக்கவா..!
அவளழகை ரசிக்கவா..!
போராட்டத்தில் அவளை
ஜெயிக்க வைத்தது
அவள் தந்த முத்தமன்றோ..!

மெல்ல அவள் துள்ளிதுள்ளி
ஓடும் அழகை ரசிக்கவா..!
கொஞ்சி கொஞ்சி பேசும்
அவளின் காதல்மொழியை ரசிக்கவா..!
வா அருகினில் வாவென
அழைக்கும் அவள்
இமைகளை ரசிக்கவா..!
உன்னுடைய பிரகாசத்தை
மங்கவைக்கும் அவளின்
முகத்தை ரசிக்கவா..!

சலக்கு சலக்கென அவளின்
கொலுசின் சத்தம் கேட்டு
இலைகளின் உள்ளே தூங்கி
கொண்டிருக்கும் பனித்துளியும்
எட்டிப் பார்க்கின்றதே..!

உன்னையும் மறக்கமுடியாமல்
அவள் அழகினில்
என்னை மறந்து
கவிபாடுகின்றேன்..!

விடியலைத் தேடி
கரையும் ஒவ்வொரு
நிமிடமும் உன் அருகாமையை
தேடித் தேடி...!

மறக்கமுடியாத
தருணங்கள் அவை..!

,

Post Comment

முதல் போணி..

அதிகாலை பனிவிழும் நேரம்
அழகான மனைவியின்
அன்பினால் உருவான‌
சூடான முத்தமும் காபியும்
கிளர்ந்தெழச் செய்தனவே..

உசும்பிய மகனை
"தூங்குடா செல்லம்"
என தட்டிக் கொடுத்த‌
கைகள், மனைவியிடம்
கொஞ்சலில் கெஞ்சியது..

"போதும் போதும்...
பையன் முழித்துவிடுவான்
வேலைக்கு போங்க..."
என்ற மனைவியின்
செல்ல சிணுங்கல்களை
கேளாமலும் இருந்தனவே காதுகள்.

காலையின் இனிமையை
ரசித்தபடியே விருவிருவென
கால்கள் முன்னேறின
கடையை நோக்கி..

முதலாய் வந்த ஆள்
கொடுத்த பணத்தை
கண்களில் ஒற்றியபடி
மனமோ வேண்டியது
"இன்று வருமானம்
நல்லாயிருக்க வேண்டும்" என்று!!..‌

,

Post Comment

கண்ணாடி வளையல்

அன்று உடைந்தபோது
மனதில் சந்தோசம் குடி கொண்டது..
காரணம் கேட்டால்
சொல்லத் தெரியவில்லை.

இன்று உடைகின்றபோது
மனதும் சேர்ந்து வலித்தது
காரணம் கேட்ட 2 1/2 வயது மகனுக்கு
சொன்னால் புரியுமா...

,

Post Comment

நான் கோவலன் அல்ல..

என் விரல்களுக்குள்
ஒரு யுத்தமே நடந்தேறியது
உன்னை முதலில் யார்
தொடுவது என..

உன்னோடு வாழ்ந்த நாட்க‌ளும்
உன்னுடன் உறங்கிய
நாட்களும் என்னில்
வந்துவந்து இமை
மூடவிடாமல் இம்சிக்கின்றன..

முதல்நாள் சந்திப்பில்
என் கண்களுக்கு
புதிதாய் உன்முகம்
மறுநாளிலிருந்து
லப்டப் என‌ என்ஓசை
கேட்கும் அறையில்
உன்னை காண்கின்றேன்..

ஜனனம் முதல் மயானம்வரை
தொடரும் உறவுகளைப்போல‌
நானும் உந்தன் உறவானேன்..
அது நம்நட்பையும் தாண்டியதோ...

மாணிக்கப் பரல்களும்
முத்துப் பரல்களும்
கொஞ்சி விளையாடிய‌
முத்தமிழும் சங்கமித்த‌
நீ இருக்கும் நகருக்குள்
என்பாதம் படும் நேரத்தில்

வாராய் வாராய் என‌
கொடிகள் அசைந்து
நகருக்குள் வரவேண்டாம் என
மறுப்பு தெரிவிக்கவில்லை

ஏன்னென்றால் நான் கோவலனும் அல்ல‌
என்கையில் சிலம்பும் இல்லை..

மாறாக, மாறாத புன்னகையுடன்
வரவேற்க ஆவலுடன் நீ..

'கோ'வென்ற அரசனும் நீயில்லை
'பி'என்ற புலவனும் நானில்லை
காணாமல் நாமும் இருக்கவில்லை

இப்போதும் காண்கிறேன்
உன்னை என்மடியில்
திரையில் நிழல்படமாய்...

நண்பா என் நண்பா...

,

Post Comment

பால பாடம்

மூழ்குவதற்கு மூச்சுப்பயிற்சி
பழகினேன் முத்தெடுக்க அல்ல..
மூழ்கியதும்தான் தெரிந்தது
மூழ்குவது கஷ்டம்தான் என்று!!
முறை தெரிந்தால் சொல்லுங்கள்
கடன் கொடுத்தவனை சமாளிக்க..

படிக்கும்போது தெரிந்த
கடன்வாங்கி கழித்தல்
இப்போதும் தொடர்கிறது
கொடுக்கல் வாங்கலில்..

தேவையும் வள‌ர்ச்சியும்
எனக்கு தேவைதான்
தேவையாய் பணம்..

பத்துரூபாய் பார்க்க‌
விலையாய் வியர்வைத்துளி..
தேவைக்கு மிஞ்சியதும்
தேவைதான்
இதுக்கு பெயர்தான்
தொடருமா?..

,

Post Comment

லேட்டா வந்தது தப்பா...

முதல் மணியோசை
தூரத்தில் ஒலிக்க
அம்மா படத்தை வணங்கி
திருநீர் இட்டு, சம்படமும்
பைக்கட்டும் தோளில்
கூடவே வர ஓட்டமும்
நடையும் விரைகையில்
அந்தோ!! 2வது மணியோசை
நிறுத்தியது என்னை
பள்ளி நுழைவாயிலில்..

தாமதம் தான் என்ன செய்ய..
கைமொழியில் இரண்டு அடியும்
நாலணா அபராதமும்
கொடுத்துவிட்டு
பள்ளியறையினில்
நுழைகையில் டீச்சர்

அன்பும் அறனும் உடைத்தாயின் இல்வாழ்க்கை
பண்பும் பயனும் அது.

என்ற குறளுக்கு விளக்கம்
கொடுத்துக் கொண்டிருந்தவர்
என் தாமத வருகையினால்
குறள் மங்கி குரல்
ஓங்கி ஒலித்தது
"மூதேவி மூதேவி..
எப்பப்பாரு லேட்டுதான்..
பரட்டத்தலையோட...
உள்ள வந்துத் தொலை என்று.."

ஏய் ஏய்.. இதுவரை என்ன‌
என்று அருகாமையை வினவியதில்
டீச்சரின் குரல் மேலும்
என்னை கலவரமாக்க..
"எலே உருப்படாதவனே..
வந்ததே லேட்டு., அங்க என்ன‌
சலசலன்னு பேச்சி.."
அவரது பார்வையில்
நானொரு .......

யாரெல்லாம் வீட்டுப்பாடம்
எழுதலைன்னு கேட்க‌
கோபப்பட்டு சபையிலிருந்து
வெளியேறுபவன் போல‌
விருட்டென எழுந்த என்னை..

"தெரியுமே தெரியுமே..
அது நீதான்னு...
வர்றது லேட்டு
எப்பப்பாரு பேச்சி..
வீட்டுப்பாடம் எழுதாத தில்லு..
படிச்சி கிழிச்சது போதும்
வீட்டுல உங்கம்மா அப்பாவ‌
கூட்டிட்டுவா.."

என்று முன்பைவிட
குரல் ஓங்காரமாய் ஒலிக்க‌

நீட்டுடா கையை என்றவருக்கு
உள்ளத்தை காட்டும்
கண்ணாடி போல
உள்ளங்கையை
நான் காண்பிக்க..

எப்படியும் அடி பிண்ண போறாங்க‌
ரொம்ப வலிக்குமே
கண்களை மூடியபடி
என்கையை நீட்டியபடியே
நின்ற என்காதுகளில்

"டீச்சர் அவனுக்கு
அம்மா கிடையாது.."

என்ற குரல் ஒலித்தது.

"எலே என்னடா இது..
கையில் கொப்பளமா..
எப்படிடா இதெல்லாம்"
வினவிய டீச்சருக்கு

"என்ன சொல்ல..
அம்மா இற‌ந்ததும்
சித்தி வந்தகதையை சொல்லவா..
தன் குழந்தையை
சீராட்டி வளர்த்த சித்தி
என்னை பரதேசியாய்
அலையவிட்ட கதையை சொல்லவா..
வீட்டுவேலை செய்யமுடியாமல்
செய்து படிக்க உட்காரும்போது
கையில் சூடுபோட்ட கதையை சொல்லவா..
எந்த கதையை நான் சொல்ல..
நான் லேட்டா வந்தது தப்பா.."

சொல்லுங்க சொல்லுங்க சொல்லுங்க...

கண்மூடி நின்ற எனக்கு
எதோ உணர்வு என்னைத் தாக்க‌

டீச்சரின் கண் நீர் என்
கொப்பளத்துக்கு
மருந்தினை கொடுக்க..
அவரின் அணைப்பினில்
என் அன்னையின்
அரவணைப்பை கண்டேனே...

***************

நண்பர்கள் அனைவருக்கும் என் இனிய நண்பர்கள் தின வாழ்த்துகள்.

,

Post Comment

வானமே எல்லை?..

காடும் சிறுத்து
கழனிக்கு செல்லாத‌
மாடுகள் சென்றன‌
இல்லாத காடிப்பானையை?..

பார்த்து பார்த்து
சலித்துப்போன‌
வானமும் பொய்த்தது
மழை மேகமும்
கேட்டது சில்வர் அயோடைடை?..

பசியால் வந்தோரை
பசியாற வைத்தும்
இன்று பசியாற்ற‌
ஒவ்வொரு கணமும்
உருளுகிறது வயிற்றினிலே?..

பள்ளிக்கு சென்றவனும்
திரும்பினான் புத்தகமில்லாமல்?..
ஏட்டு சுரைக்காய்
கறிக்கு உதவாது
என்றெண்ணியோ?...

பட்டுப்போன
பயிரல்லாம் என்னைவிட்டு
போகாதே என்று சொன்னாலும்
நான் பட்டுபோகாமலிருக்க‌
பட்டண பிரதேசம் செல்கிறேன்?..

,

Post Comment

அறியா பருவம்

பத்துமாசம் சுமந்து
பெற்றதால் என்னவோ
அம்மாவுக்கு எவ்வளவு
சந்தோசம் முகத்தினிலே!!
எத்தனை எத்தனை
கோயில்களுக்கு சென்றிருப்பாளோ
என் வரவுக்காக..

தவழும்போதும் குப்புற
விழுந்து நான் அழும்போதும்
என் அழுகையை ரசித்து
பாலூட்டி தாலாட்டி
உறங்கவைத்தாள் என் அன்னை.

நடைபயில கற்றுக்
கொடுத்து நான்
நடக்கமுயற்சித்தாலும்
நடக்க விடுவதில்லை..
இடுப்பை விட்டு இறக்காமல்
எப்போதும் தூக்கிக்கொண்டு
கண்ணுக்கு கண்ணாக
காத்தாள் என் அன்னை.

நான் தனியாக சென்றால்
பதபதைப்புடன் உடனே
தேடி வந்து அள்ளிச்
செல்வாள் அன்னை.

குறும்பு சேட்டைகள்
செய்யும்போது கண்டிக்க‌
மனம் வருவதில்லை..
பாசம் நேசம்
எல்லாம் கண்டேன்
என் அன்னையிடம்..

நர்சரிக்கு செல்லும்
வயதில் சென்றேன்
அவளைவிட்டு பிரிந்து..
செல்லும்போதே மனம்
வலித்தது இருவருக்கும்

திரும்பி வந்தேன்
சலன‌மற்று..
அன்னையின் முகம்
காணமுடியாமல் நான்
கரிக்கட்டையாய்..


( 2004 ஜூலை 16 கும்பகோணம் பள்ளி தீவிபத்தில் பலியான பிஞ்சுகளுக்கு அஞ்சலிகளுடன் இந்த இடுகையை சமர்பணம் செய்கிறேன். )

,

Post Comment

கவிஞனாய் நான்..

கணநேரமும் எதிர்பார்த்த
வேளையில் குவாங் குவாங்
என்றபடி உன் வருகையை
எண்ணி ஆனந்தம் அடைந்தேன்

சொரசொரப்பான‌ என்கரம்
உன்கரம் பற்றிட ஏங்குகிறது.
உன்மொழியின் அர்த்தம்
தேடுகிறேன் அகராதியில்
கிடைக்காது என்று தெரிந்தும்..

சிணுங்கி சிணுங்கி நீ
கேட்கும் ஒவ்வொன்றுக்கும்
நான் வாங்கித்தரும் முன்
நான் காட்டும் பொய்க்கோபம்
கண்டு ஒதுங்கி செல்லும்
உந்தன் விழிகள்
'அப்பா அடிப்பாரோ'
என்ற மிரட்சியுடன்...
ரசிக்கத் தூண்டுது!!.

என்னில் உன்னை கண்டேன்
நீ செய்யும் குறும்பு
சேட்டைகளில் நானும்
பங்கெடுக்கிறேன்
என்னுடைய பால்யகால‌
நினைவுகளுடன்..

ஆர்வமுடன் படிக்கிறேன்
உன்னை படிக்கவைக்க..
அன்பும் பாசமும் நிறைந்த‌
அப்பாவுக்கு என்று நீ
எழுதும் நாளுக்காக..

நீ காணும் ஒவ்வொரு
கனவுக்கும் உனக்காக
கனவு காண்கிறோம்
நானும் என்னவளும்..


,

Post Comment

தப்பு தாளம்

தப்பு என்று தெரிந்தும்

யோசிக்கத் தோணுது

தப்பு தப்பாய்...

தப்புசெய்து பழக்கப்பட்ட‌

அவன் திருந்தி

நல்வழியில் செல்கையில்

தவறு செய்யும்போது

வேதனையில் துடித்தான்.

அவனிடம் கேட்டேன்

தப்புக்கும் தவறுக்கும்

உள்ள வித்யாசம்

என்னவென்று..?..

,

Post Comment

நீ நான் அவள்

நீ நான் அவள்
இது தமிழ் இலக்கணமல்ல‌
அருகில் நீ இலக்கணமாய்
தொலைவில் அவள்
இலக்கணம் மறந்து
யாரையோ அழைத்தபடி..

,

Post Comment